2024-cü il mayın 30-da Xəzər Universiteti Elmi Şurasının növbəti iclası keçirildi.

İclası universitetin rektoru, Elmi Şuranın sədri Dos. İradə Xəlilova açaraq, gündəlikdəki məsələləri   nəzərə çatdırdı.

İclasın birinci məsələsi olan doktorantların dissertasiya mövzularının adları və elmi rəhbərləri haqqında elmi katib Günel Bahəddinova məlumat verdi. Hər iki doktorant araşdıracaqları dissertasiya mövzularının aktuallığı və məqsədi barədə məlumat verdikdən sonra təkliflər nəzərə alınaraq, dissertasiya mövzularının adları və elmi rəhbərləri təsdiq olundu.

Gündəliyin ikinci məsələsi olan magistrlərin dissertasiya mövzularının dəyişdirilməsi ilə bağlı elmi katib bildirdi ki, bəzi tələbələr tədqiqat apardıqları müddətdə tədqiqatlarının istiqamətindən asılı olaraq dissertasiya mövzularının adında cüzi dəyişikliklərin olması ilə bağlı fakültəyə müraciət ediblər. Fakültə tərəfindən dissertasiya mövzularının Elmi Şuraya təqdim olunmuş yeni adları təsdiq edildi.

Gündəlikdəki növbəti  məsələ olan fəlsəfə doktorluğu proqramı üzrə hazırlanan minimum  imtahan proqramları və proqrama verilən rəylər haqqında elmi katibin məlumatı dinlənildi. Elmi Şura üzvləri tərəfindən proqramların tərtibatı ilə əlaqədar təkliflər irəli sürüldü və müvafiq qərar qəbul olundu.

Elmi Şuranın sonuncu məsələsi kimi Siyasi elmlər və fəlsəfə departamentinin müdiri Dr. Orxan Vəliyevin  dosent adının verilməsi üçün Azərbaycan Respublikası Prezidenti yanında Ali Attestasiya Komissiyası qarşısında vəsatət qaldırılması ilə bağlı  Elmi Şuraya müraciəti müzakirə olundu. Elmi Şuranın katibi iddiaçı haqqında ətraflı məlumat verdi. Gizli səsvermədən sonra  Hesablama komissiyasınının sədri tərəfindən nəticə şura üzvlərinə açıqlandı və protokol tərtib edildi.

İclasın sonunda sədr növbəti Elmi Şuranın gündəliyində duracaq məsələlərlə bağlı məlumat verdi və bu məsələlərlə bağlı hazırlıqların aparılmasını tapşırdı.