Qoşulmama Hərəkatı Gənclər Təşkilatının (QHGT) təşəbbüsü ilə 2024-cü il mayın 24-də təşkilatın mənzil-qərargahında Afrika Gününə həsr olunmuş mədəni mübadilə tədbiri keçirilmişdir. Qoşulmama Hərəkatına (QH) üzv dövlətlərin gəncləri arasında mədəni həmrəyliyi və müxtəlifliyi təşviq etmək məqsədi daşıyan bu tədbirdə QH-a üzv dövlətlərdən olan gənclər, eləcə də Azərbaycandan olan yerli gənclər iştirak etmişlər. Tədbir Qoşulmama Hərəkatı Gənclər Təşkilatının baş katibi Nigar Bağırlının çıxışı ilə başlamışdır.O, qeyd etmişdir ki, əsas məqsəd gəncləri Afrikanın rəngarəng və qədim mədəniyyəti ilə tanış etmək, mədəni həmrəylik və müxtəlifliyi təbliğ etməkdir.
Azərbaycanda yaşayan afrikalı gənclər Afrika Gününün əhəmiyyəti və Afrika qitəsinin zəngin mədəni irsi haqqında müxtəlif təqdimatlar, mahnı və rəqslər nümayiş etdirmiş, o cümlədən iştirakçıları milli mətbəx nümunələri ilə tanış etmişlər. Bununla yanaşı sual-cavab xarakterli oyun da təşkil edilmiş, qalib iştirakçılara QHGT tərəfindən hədiyyələr təqdim edilmişdir.
Müxtəlif Afrika ölkələrindən olan əcnəbi gənclərin tədbirə qatılması daha inklüziv və mədəni birliyin qurulmasında əhəmiyyətli rol oynadı. Xəzər Universitetini təmsil edən Abebe Gule Girma, Fatima Schroeder, Emmanuella Ofori və Fudia Turay da tədbirə öz töhfələrini vermişlər.