2024-cü il mayın 23-də Landmark iş mərkəzinin “GAİA” kino zalında Giedrė Žičkitenin “Ustad və Tatyana” adlı sənədli filminin nümayişi baş tutub.

Film Xəzər Universitetinin İngilis dili və ədəbiyyatı departamentinin, eləcə də  Tərcümə mərkəzinin rəhbərliyi  ilə  tərcümə ixtisasında təhsil alan 4-cü kurs tələbələri Asif Məmmədov, Gülsün Həmidova və Xalidə Suleymanova tərəfindən azərbaycan dilinə tərcümə edilib.

Qeyd edək ki, film litvalı məşhur fotoqraf Vitas Lutkusun həyat hekayəsindən bəhs edir. “Bəziləri onu dəli, bəziləri isə dahi adlandırırdı. O, Litva mühitindən kənara çıxan və sovet respublikalarının kortəbii reallığını sənədləşdirən ilk şəxs idi”.

Filmin nümayişinə başlamazdan öncə Litvanın Azərbaycandakı müvəqqəti işlər vəkili Viktoras Daqilis Xəzər Universitetin rəhbərliyinə   göstərdiyi  dəstəyə görə  təşəkkürünü bildirərək Universitetin İngilis dili və ədəbiyyatı departamentinin müdiri Milana Ababsovaya söz verib. Daha sonra filmin Azərbaycan dilinə tərcüməsinə və subtitrlərdə əks olunmasına köməklik göstərən  tələbələrin mükafatlandırma mərasimi keçirilib.