Azərbaycan Respublikasının Mədəniyyət Nazirliyinin dəstəyi ilə Dünya Gənc Türk Yazarlar Birliyinin gerçəkləşdirdiyi “Tanı, oxu, tanıt” ədəbiyyat könüllülüyünün təbliği layihəsi çərçivəsində növbəti tədbir  2024-cü il  mayın 20-də  Xəzər Universitetində baş tutub.

Tədbiri  giriş nitqi ilə  Dillər və ədəbiyyatlar departamentinin müəllimi Yeqzar Cəfərli açaraq, sözü departamentin müəllimi Dr. Qardaşxan Əzizxanlıya verib. Özü də şair olan Qardaşxan Əzizxanlı qonaqları salamlayaraq, bədii sözün əhəmiyyətindən və layihənin önəmindən danışıb.

Ardınca Milli Məclisin Mədəniyyət Komitəsinin eksperti, Dünya Gənc Türk Yazarlar Birliyinin Məsləhət Şurasının başqanı, şair- publisist Əkbər Qoşalı ədəbiyyat könüllülüyündən, onun bugünkü vəziyyətindən bəhs edib. Birliyin başqanı, şair-publisist İntiqam Yaşar, Birliyin üzvləri -şair Taleh Mansur, Səddam Laçın, Valeh Qoca  çıxışlarında DGTYB-nin ədəbi layihələrindən söz açıblar və  layihə çərçivəsində çap olunmuş “Ədəbi toplu-2024” adlı kitabda yer almış şeirlərini səsləndiriblər.

     Xəzər Universitetinin Dillər və ədəbiyyatlar departamentinin müəllimləri- Dos. Zivər Hüseynli-Baylan, Dr. Zəminə Ziyayeva, Dr. Almaz Bədəlova və Dr. Mədinə Karahan öz çıxışlarında  bu cür tədbirlərin  əhəmiyyətindən danışıblar. Daha sonra Dillər və ədəbiyyatlar departamentinin tələbələrindən – Ayla Yusifova  Xəyalə Sevilin “Cəzalıdı ürəyim”, Rəvanə Məhərrəmova isə Həsən Kürün “Cəbhədən məktub” şeirlərini səsləndiriblər.

Sonda bütün iştirakçılara DGTYB-nin nəşr etdirdiyi  kitablar  hədiyyə edilib, tədbirdə fəallıq göstərən tələbələrə diplomlar verilib və  xatirə şəkli  çəkdirilib.