2024-cü il aprelin 8-9-da Bakı Biznes Universitetinin koordinatoru olduğu və Avropa Komissiyası tərəfindən maliyyələşdirilən “Azərbaycan Rektorlar Konfransının yaradılması” Erasmus+ layihəsi çərçivəsində növbəti görüş Gəncə şəhərində baş tutub. Görüşdə Xəzər Universitetinin Beynəlxalq Əlaqələr şöbəsinin müdiri Fatimə Vəliyeva iştirak edib.
Tədbirin ilk günü Azərbaycan Texnologiya Universitetində (Gəncə) keçirilən komitə iclasında universitetin tədris işləri üzrə prorektoru Dos. Raqif Hüseynov iştirakçıları salamlayaraq, bu layihənin təhsilin beynəlmiləlləşməsi, həmçinin rəqəmsal və innovativ iqtisadiyyatda ali təhsil müəssisələrinin rolunu artırmaq məqsədilə universitetlərarası əlaqələrin təmin olunmasına əhəmiyyətli dərəcədə dəstək verdiyini vurğulayıb.
Tərəfdaş ali təhsil müəssisəsinin məsul şəxslərinin iştirakı ilə keçirilən görüşdə Azərbaycan Dillər Universitetinin Beynəlxalq əlaqələr üzrə prorektoru, əvvəlki Beynəlmilələşmə komitəsinin sədri Dos. Jalə Qəribova komitənin hesabatını təqdim edib. Bakı Biznes Universitetinin Beynəlxalq əlaqələr üzrə prorektoru Eşqin Bayramov komitə sədri və sədr müavinlərinin yenidən seçkisinin keçirilməsi ilə bağlı iştirakçılara məlumat verib və səsvermə keçirilib.
Tədbirin növbəti günündə Azərbaycan Dövlət Aqrar Universitetində (ADAU) keçirilən görüşdə layihə çərçivəsində yaradılan Beynəlmiləlləşmə komitəsinin gələcək fəaliyyətinə dair müzakirələr aparılıb. Sonra isə qonaqlar Azərbaycan Dövlət Aqrar Universitetinin maddi-texniki bazası ilə yaxından tanış olublar.