2024-cü il fevralın 27-də İqtisadiyyat və menecment fakültəsinin təşkilatçılığı ilə “Enterprise Azerbaijan” portalının Almaniyanın Süni İntellekt Araşdırma Mərkəzi və ABŞ-ın Nevada Universiteti ilə birgə növbəti “Startup School” layihəsi çərçivəsində infosessiya baş tutub. İnfosessiyada fakültənin tələbələri layihə haqqında məlumat əldə ediblər və onları maraqlandıran suallara cavab alıblar.

Qeyd edək ki, “Yaşıl həmrəylik naminə süni intellekt” (AI for Green Solidarity) devizi altında keçirilən budəfəki müsabiqə də startapçılara geniş imkanlar təqdim edir: ABŞ, Almaniya, İngiltərə, Türkiyə, Rusiya, Polşa, CAR və Azərbaycandan olan mentorlar tərəfindən təlim; Kursu bitirən bütün startaplara beynəlxalq səviyyəli sertifikat; I yerin qalibinə ABŞ-da I2B treninqdə iştirak imkanı; I, II və III yerlərin qaliblərinə Dövlət Məşğulluq Agentliyi tərəfindən dəstək; 5 layihəyə Türkiyədə OSTİM Texnologiya Mərkəzində praktiki təlimlərdə iştirak etmək imkanı;5 layihəyə Qarabağda keçiriləcək “AI for Karabakh” hakatonunda yarışmaq imkanı; 10 layihəyə SABAH.HUB-ın inkubasiya proqramında iştirak imkanı; 10 layihənin “Startap şəhadətnaməsi” üçün müraciətinə KOBİA tərəfindən sürətləndirilmiş dəstəyin göstərilməsi.

Layihəyə 2024-cü il martin 17-dək qatılmaq istəyən hər hansı ali təhsil müəssisəsini təmsil edən, süni intellektlə bağlı layihəsi və ya ideyası olan hər kəs (fərdi və ya 3-5 nəfərlik komanda şəklində) müraciət edə bilər.