Xəzər Universitetində Fizika və elektronika departamenti tərəfindən Nəzəri Fizika Elmi-Tədqiqat Mərkəzi fəaliyyətə başlayıb. Mərkəzin direktoru fizika üzrə fəlsəfə doktoru Şahin Mamedov təyin edilib.

Dos. Şahin Mamedov Bakı Dövlət Universitetinin Fizika Problemləri İnstitutunun Nəzəri Fizika departamentinin aparıcı elmi işçisidir.

Mərkəz 3 bölmədən ibarətdir: Yüksək enerjilər fizikası, Qravitasiya və kosmologiya, Kondensləşmiş maddə fizikası. Yüksək Enerjilər Fizikası bölməsində adronların qarşılıqlı təsiri holoqrafik kvant xromodinamikası modelləri çərçivəsində öyrənilir. Qravitasiya və kosmologiya bölməsi təbii dünyanı idarə edən əsas qanunlarla bağlı dərin maraqdan irəli gələn nəzəri tədqiqat qrupudur. Kondensləşmiş maddə fizikası bölməsində isə kondensləşmiş hal nəzəriyyəsinin məsələləri araşdırılır və tədqiqatın tematik sahələri bunlardır: aşağı ölçülü strukturlarda kvant nəqli, aşağı ölçülü kvant materialları, kvant qraflar və şəbəkələri, kvant texnologiyaları, eləcə də keçirici polimerlərdə yük dinamikasının modelləşdirilməsi. Mərkəzin ilkin tərkibi 14 nəfərdən ibarətdir və onun 3 nəfəri elmlər doktoru və professor, 4 nəfəri fəlsəfə doktoru, 7 nəfəri isə doktorantdır. Üzvlər Azərbaycan, Türkiyə, Rusiya, Özbəkistan, İran, Koreya, Braziliya, kimi ölkələrin elm qurumlarında fizika sahəsi üzrə elmi fəaliyyət göstərirlər.