2024-cü il fevralın 23-də Xəzər Universitetində təhsil alan tələbələr üçün Beynəlxalq əlaqələr şöbəsi tərəfindən “Erasmus+ Mübadilə Proqramı” barəsində infosessiya keçirilib. Sessiya Beynəlxalq əlaqələr şöbəsinin koordinatoru Əli Mirzəzadə tərəfindən təqdim edilib. Təqdimat zamanı “Erasmus+ Mübadilə Proqramı”nın xüsusiyyətlərindən, proqrama qoşulmaq üçün tələb olunan sənədlərdən və proqramın təklif etdiyi imkanlardan söz açılıb və bu prosesdə Beynəlxalq əlaqələr şöbəsinin tələbələrə hansı şəkildə dəstək ola biləcəyi izah edilib.

Təqdimatın ardınca İtaliyanın Tuscia Universitetində mübadilə proqramında iştirak etmiş Seymur Mirzəliyev çıxış edərək, öz təcrübəsini iştirakçılarla bölüşüb və proqram çərçivəsində onların hansı imkanlar əldə edəcəklərini söyləyib.

Seymur Mirzəliyevin çıxışından sonra sual-cavab sessiyası başlayıb. Tələbələr proqramın texniki və digər detalları ilə bağlı fərqli suallar səsləndiriblər. Sualları Beynəlxalq əlaqələr şöbəsinin müdiri Fatimə Vəliyeva, koordinatoru Əli Mirzəzadə və Erasmus+ çərçivəsində əvvəlki mübadilə proqramında iştirak edən Seymur Mirzəliyev cavablandırıb.