2024-cü il fevralın 9-da Xəzər Universitetində “Riyaziyyat və onun tətbiqləri” elmi-tədqiqat mərkəzinin (Center for Mathematics and its Applications) təsis edilməsi haqqında əmr imzalanıb. Bu mərkəz Riyaziyyat departamentindən asılı olmayan, Xəzər Universitetinin sərbəst bir struktur bölməsi kimi fəaliyyət göstərəcək. Mərkəzin direktoru professor Vüqar İsmayılov, həmdirektoru professor Anar Əhmədov və Xəzər Universiteti Riyaziyyat departamentinin müdiri Əli Hüseynli Xəzər Universiteti üzrə koordinator təyin ediliblər.

Vüqar İsmayılov bir müddət İsrail Texnologiya İnstitutunda (Israel İnstitute of Technology) işləmiş, müntəzəm olaraq Oksford Universitetinə məruzəçi kimi dəvət olunan, Azərbaycanın beynəlxalq miqyasda tanınan riyaziyyatçısıdır. Bir müddət əvvəl onun monoqrafiyası Amerika Riyaziyyat Cəmiyyətini (AMS) tərəfindən nəşr olunub. Qeyd edək ki, bu, müsəlman ölkələrində, həmçinin Gürcüstan və Ermənistanda fəaliyyət göstərən riyaziyyatçılar arasında yeganə nümunədir.

Anar Əhmədov Amerikada - Kaliforniya Dövlət Universitetində bakalavr, İrvaynedəki Kaliforniya Universitetində doktorantura təhsili alıb, hazırda Minnesota Universitetində full professor işləyir. Qeyd edək ki, Anar Əhmədov riyaziyyatın Cəbri Topologiya (Algebraic Topology) sahəsində dünyada tanınmış mütəxəssisdir və elmi uğurlarına görə Təcrübəli Tədqiqatçıların Humbolt Tədqiqat Təqaüdü (Humboldt Research Fellowship for Experienced Researchers), 2020-ci il üçün Amerika Riyaziyyat Cəmiyyətinin Təqaüdü (topologiyanın əsas problemlərinin tədqiqinə töhfələr üçün (American Mathematical Society Fellow for 2020; for contribution to core problems in topology), Riyaziyyatçıların 2018-2022-ci illərdə elmi əməkdaşlığı üçün Saimons Qrantı (Simons Collaboration Grant for Mathematicians 2018-2022) kimi riyaziyyat sahəsində ən mötəbər təqaüdləri qazanmış, Harvard və digər məşhur universitetlərdə dəvətli professor işləmişdir.

Mərkəzin ilkin tərkibi 12 nəfərdən ibarətdir və onun 6-sı xaricdə yaşayan riyaziyyatçılardır.