Xəzər Universitetinin Həyat Elmləri departamentinin müdiri Dr. Cəmalə Eldarova, departamentin dosenti Dr. Cavid Ocaqi və Təbiət elmləri, Sənət və Texnologiya yüksək təhsil fakültəsinin dekan müavini Dr. Məhəmməd Eldarov 4 gün müddətinə (14-18 yanvar 2024-cü il) İranın İsfahan şəhərində yerləşən Royan Biotexnologiya İnstitutuna (Royan İnstitute for Biotechnology) ezam olunmuşlar.

Ezamiyyətin əsas məqsədi elmi-tədqiqat layihələrinin müzakirəsi, əməkdaşlıq əlaqələrinin gücləndirilməsi, elmi-tədqiqat laboratoriyalarının qurulması və birgə tədqiqat işlərinin yerinə yetirilməsi olmuşdur. Həyat elmləri departamentinin akademik heyəti Embriologiya, Biotexnologiya, Kök hüceyrə, Virusologiya, Andrologiya kimi laboratoriyalarda aparılan tədqiqat işləri və institutun texniki bazası ilə yaxından tanış olmuşlar. Həmçinin, Prof. Nasr Esfahani tərəfindən Royan İnstitutunun rektoru və prorektorlarının iştirakı ilə onlayn görüş təşkil edilmiş, hər iki təşkilat arasında memorandum imzalanması, birgə tədqiqat mərkəzinin yaradılması və digər əməkdaşlıq məsələləri ətraflı müzakirə edilmişdir.

“Xəzər”in əməkdaşları Prof. Nasr`ın “Pooyeshfertility” adlı özəl klinikasında da olmuş, süni mayalanma, sonsuzluğun müalicəsi, embrioloji müayinələr, cinsiyyətin müəyyən edilməsi sahəsində aparılan işlər haqqında məlumat almışlar.

Dr. Mehdi Hajian və Dr. Farnush Jafarpoor tərəfindən Royan Biotexnologiya İnstitutunun fermasına səfər təşkil olunmuş, heyvanlar üzərində aparılan tədqiqatlar haqqında hərtərəfli məlumat verilmişdir.

Beləliklə, Xəzər Universiteti ilə Royan İnstitutu arasında memorandum imzalanması, birgə qrant layihələrin yazılması və elmi tədqiqat mərkəzinin qurulması qərara alınmışdır.