2023-cü il dekabrın 26-da Xəzər Universitetinin Mərmər zalında Memarlıq və dizayn departamentinin təşkilatçılığı ilə Tələbə və müəllim birliyinin rəmzi olan “Xəzərin işığında” adlı sərgi nümayiş etdirildi. Tədbiri Xəzər Universitetinin təsisçisi, Direktorlar və Qəyyumlar Şurasının sədri Prof, Akad. Hamlet İsaxanlı açaraq, müəllimlərə və tələbələrə yaradıcılıq sahəsində uğurlar diləyib.

Sonra Əməkdar müəllim və rəssam Yaşar Səmədov, eləcə də müəllimlər Şəfiqə Yusupova və Nərmin Qasımova sərgi haqqında öz təəssüratlarını bölüşüblər.

Sərginin keçirilməsində əsas məqsəd tələbələrə dəstək olmaq, onları yaradıcılıq sahəsində ruhlandırmaq idi. Təsviri İncəsənət müəllimliyi ixtisasının ikinci kurs tələbəsi Nazlı Əsgərova müxtəlif mövzu və üslublarda ərsəyə gətirdiyi rəsm əsərlərini sərgi iştirakçılarına təqdim edib və tələbələrə göstərilən diqqətə görə departament rəhbərliyinə təşəkkürünü bildirib.

Memarlıq və dizayn departamentinin Təsviri sənət müəllimləri Həsənağa Həsənov, Mehdi Samadi, Şəfiqə Yusupova, İskəndər Məmmədov, Nigar Əliyeva, dizayn müəllimi Nərmin Qasımova və təsviri sənət tarixi müəllimi, sənətşünas Dos. Xəzər Zeynalov da müxtəlif mövzularda ərsəyə gətirdikləri rəsm əsərlərini təqdim edərək, gənc istedadlara dəstək nümayiş etdiriblər.

Tədbirdə iştirak edən qonaqlar, tələbə və müəllim heyəti sərgiyə böyük maraq nümayiş etdiriblər.

“Xəzərin İşığında” adlı Tələbə və müəllim birliyinin rəmzi olan sərginin sonunda təşəkkür plaketi təqdim olundu.