2023-cü il noyabrın 30-da Xəzər Universitetinin ənənəvi “Elm və Sənət Məclisi”nin 81-ci məşğələsi keçirildi. Məşğələni giriş sözü ilə universitetin təsisçisi, Direktorlar və Qəyyumlar Şurasının sədri Prof. Akad. Hamlet İsaxanlı açaraq, Türkiyə İstanbul Üniversitetinin professoru Eyüp Sarıtaş haqqında iştirakçılara ətraflı məlumat verdi və görkəmli alimin çin mənbələrindəki araşdırmalarından danışdı. Sonra E.Sarıtaş “Çin mənbələrinə görə qədim türk tarixi və mədəniyyəti” mövzusunda geniş və maraqlı məruzə ilə çıxış etdi.

Məruzədən sonra professor məşğələdə iştirak edən Azərbaycanın müxtəlif təhsil və elm mərkəzlərinin alimlərinin və tələbələrin suallarını cavablandırdı. Sualları Eyüp Sarıtaş`a Şahin Fazil (AMEA Tarix İnstitutu), Nərgiz Əliyeva (Milli Azərbaycan Tarixi Muzeyi), Hamlet İsaxanlı, Roza Arazova və Kəmalə Mustafayeva (Xəzər Universiteti), Bəhlul İbrahimli və İsmayıl Umudlu (AMEA Arxeologiya, Etnoqrafiya və Antropologiya İnstitutu), Solmaz Tohidi (AMEA Şərqşünaslıq İnstitutu), Elçin Məmmədli (“Təzadlar” qəzeti) və digər şəxslər ünvanladılar.

Məşğələ keçirilən salonda universitetin xalçaçı-rəssamı Vəfa Əlizadənin yaradıcılıq nümunələri olan xalçalar və əl işlərindən ibarət digər əşyalar nümayiş etdirildi. Sərgi iştirakçıların böyük marağına səbəb oldu.