2023-cü il noyabrın 8-də Qazaxıstan Respublikasının Almatı şəhərində Azərbaycanın Zəfər Günü münasibətilə tədbir keçirilmişdir. Azərbaycanın Qazaxıstandakı səfirliyi tərəfindən təşkil olunan tədbirə Azərbaycanın incəsənət ustaları – Xəzər Universitetinin Musiqi və incəsənət departamentinin müdiri, əməkdar müəllim, tanınmış pianoçu Zülfiyyə Sadıqova, əməkdar artistlər İlahə Əfəndiyeva və Fərid Əliyev dəvət olunmuşdular.

Qazaxıstanın Dövlət himnindən sonra Azərbaycanın Dövlət himni Zülfiyyə Sadıqovanın pianoda müşayiəti ilə İlahə Əfəndiyeva və Fərid Əliyev tərəfindən ifa edilmişdir.

Qazaxıstanda yaşayan azərbaycanlıların, Qazaxıstan ictimai xadimlərinin və Almatı şəhərində yerləşən diplomatik korpusun nümayəndələrinin iştirak etdiyi tədbiri giriş sözü ilə açan səfir Ağalar Atamoğlanov şanlı Zəfər bayramı haqqında qonaqlara ətraflı məlumat vermiş, 8 noyabr-Zəfər Gününün Azərbaycan xalqının iradəsinin və gücünün təntənəsinə çevrildiyini qeyd etmişdir.

Qazaxıstan Respublikası Xarici İşlər Nazirliyinin Almatı şəhərində nümayəndəliyinin rəhbəri Bakıtjan Buleqenov çıxış edərək, Azərbaycanın Dövlət Bayrağı Günü və ərazi bütövlüyünün bərpa olunması münasibətilə təbriklərini çatdırmışdır.

Tədbir bədii hissə ilə davam etmişdir. İlahə Əfəndiyeva və Fərid Əliyev Zülfiyyə Sadıqovanın müşayiəti ilə Azərbaycan, Qazaxıstan və Avropa bəstəkarlarının əsərlərini ifa etmişlər.