2023-cü il oktyabrın 31-də Azərbaycan Nəşriyyatları Assosiasiyası Xəzər Universitetində II Payız Oxu Marafonu ilə bağlı məlumat sessiyası keçirib. Sessiya prosesində Assosiasiya təmsilçilərinin verdiyi maraqlı bir məlumat tələbələrin diqqətini cəlb edib. Məlum olub ki, Azərbaycan Respublikası Elm və Təhsil Nazirliyi Təhsilin İnkişafı Fondunun keçirdiyi Oxu marafonunda iştirak etmək istəyən tələbələr 3 ay ərzində (1 0ktyabr 2023-1 yanvar 2024) 8 kitab oxuyaraq, imtahan və müsahibədən keçəndən sonra 10 nəfər finalçı arasında pul mükafatı qazanmaq şansına malik ola bilərlər. Təbii ki, məqsəd tələbələrdə kitaba olan məhəbbəti artırmaqdır.

Sessiyanın davamı olaraq tanınmış yazıçı Rövşən Abdullaoğlu da çıxış edərək, qələmə aldığı “Koramal” kitabı barədə iştirakçılara geniş məlumat verib və onların suallarını cavablandırıb.

Sonra aktyor Əhliman Ərşadlı və teatrşünas Afaq Ağayeva "Koramal" kitabından hazırladıqları maraqlı məqamları tələbələr üçün səsləndiriblər və sonda kitab əsasında lentə alınmış qısa video-parçalar təqdim olunub.