2023-cü il oktyabrın 23-27-də Xəzər Universiteti Siyasi elmlər və fəlsəfə departamentinin müdiri Dr. Orxan Vəliyev Erasmus-İşçi heyətinin tədris mübadiləsi proqramı (KA171) çərçivəsində Polşanın Vroslav Universiteti Sosial elmlər fakültəsinin Avropa Araşdırmaları İnstitutunda olmuşdur. Dr. Vəliyev institutun magistr tələbələrinə “Atəşkəsdən zəfərə: Azərbaycanda dövlət və milli kimlik” mövzusunda mühazirə oxumuşdur. Mühazirə tələbə və müəllimlərin sualları ilə başa çatmışdır. Proqramda Xəzər Universiteti ilə yanaşı, müxtəlif ölkə və universitetlərdən də elm adamları iştirak etmişdir.

Dr. Vəliyev proqram çərçivəsində Vroslav Universiteti Beynəlxalq ofisinin müdiri Urszula Broda və prorektor Dr. Maciej Cesarz ilə görüşmüşdür. Dr. Cesarz ilə görüşdə Xəzər Universiteti Siyasi elmlər və fəlsəfə departamenti ilə mümkün əməkdaşlıq müzakirə edilmişdir.