2023-cü il sentyabrın 25-27-də Xəzər Universitetinin əməkdaşları - İqtisadiyyat və menecment fakültəsinin dekanı Dr. Ceyhun Məmmədov, İqtisadiyyat və menecment departamentinin koordinatoru Dr. Bahadır Baysal, Karyera Mərkəzinin meneceri Səbinə Allahverənova, Tarix və arxeologiya departamentinin müəllimləri Dr. Bayram Quliyev və Kəmalə Mustafayeva ERASMUS+ PICASP layihəsi çərçivəsində Vilnüs Gediminas Texniki Universitetində olublar.
PICASP layihəsinin (Xəzər regionunun inkişafını dəstəkləmək məqsədilə universitet-sənaye əməkdaşlığını həyata keçirən təcrübə müəssisələri pilot kursları) əsas məqsədləri təcrübə müəssisəsi ilə yeni tədris metodları hazırlamaq, sahibkarlıq və KOB-ların idarə edilməsi üzrə kurslar təşkil etmək, Avropa İttifaqı tərəfdaşları ilə təcrübə mübadiləsini artırmaq və maraqlı tərəflərin kurikulumların hazırlanmasında və məzunların məşğulluğunda iştirakını təmin etməkdir.
Xəzər Universitetinin əməkdaşları “Turizmdə təməlqoyma texnologiyaları”, “Turizm trendləri: Turizm sənayesi üçün ən son imkanlar”, “Litva irsinin qorunması sisteminə baxış”, “Litva yəhudilərinin tarixi- mədəni irsi və tarixi”, “Litvada virtual turizmin tətbiqi imkanları” mövzularında ardıcıl davam edən təqdimatlarda iştirak ediblər. Onlar, həmçinin, Litva Hersoqlarının Sarayı, Gediminas Qala Qülləsi, Litva Milli Muzeyi, Vilnüs Qədim Şəhəri və Uzupis Respublikasına təşkil edilən ekskursiyada olublar.
Sonuncu gün təşkil olunan idarəetmə görüşündə Dr. Ceyhun Məmmədov Xəzər Universitetində layihə fəaliyyətlərinin həyata keçirilməsi və qarşıya qoyulan məqsədlərə uyğun görülən praktiki işlər və gələcəkdə reallaşdırılması düşünülən perspektivlər haqqında geniş məlumat vermişdir. Görüş cari nəticələrin, ehtiyacların, gözləntilərin və gələcək planların müzakirəsi ilə başa çatıb.