2023-cü il iyulun 28-də Başkent Universitetinin qurucusu və Yönətim Üst Kurulu Başqanı Prof. Dr. Mehmet Haberal`ın şəxsi dəvəti ilə Xəzər Universitetinin təsisçisi, Direktorlar və Qəyyumlar Şurasının sədri Prof. Akad. Hamlet İsaxanlı və rəhbərlik etdiyi heyət Başkent Universitetinə ikinci dəfə dəvət edildi.

Başkent Universitetinin qurucusu Mehmet Haberal qonaqları universitetin girişində qarşılayaraq, səmimi şəkildə salamladı. Öncə o, qonaqları özünə məxsus olan şəxsi əşyaları yerləşdirilmiş müzey ilə tanış etdi, öz həyatı və fəaliyyəti, yaradıcılığı haqqında məlumat verdi, orqan nəqli sahəsində gördüyü misilsiz işlərdən və Başkent Universitetinin yaradılmasından danışdı.

Mehmet Haberal`ın və Hamlet İsaxanlı`nın görüşündə Başkent Universitetinin rektoru Prof. Dr. Haldun Müderrisoğlu, akademik işlər üzrə prorektorlar Prof. Dr. Abdulkadir Varoğlu, Prof. Dr. Füsun Eyidoğan, Tibb fakültəsinin dekanı Prof. Dr. Derya Akaydın Aldemir, Eğitim fakültəsinin dekanı Prof. Dr. Sadegül Akbaba Altun, Ankara xəstəxanasının baş həkimi Prof. Dr. Adnan Torgay, Beynəlxalq ofisin koordinatoru İrem Aşçılı, Beynəlxalq xəstələr üzrə departamentin koordinatoru Dr. Turhan Namazov və digər şəxslər iştirak etdilər.

Həmin gün Mehmet Haberal Hamlet İsaxanlı və qonaqların şərəfinə ziyafət verdi, onlara hədiyyələr təqdim olundu. Ziyafətdə East-West Universitetinin qurucusu Teimuraz Khurodze və Xəzər Üniversitetinin İctimai əlaqələr və media üzrə direktoru Əlövsət Əmirbəyli iştirak etdilər.

Mehmet Haberal`ın xüsusi tapşırıqına uygun olaraq Beynəlxalq xəstələr üzrə departamentin koordinatoru, həmyerlimiz Dr. Turhan Namazovun bələdçiliyi ilə qonaqlar Başkent Üniversitetinin klinikaları ilə yaxından tanış oldular.

Həmin gün axşam Gazi Üniversitetinin professoru Çetin Elmas Hamlet İsaxanlının şərəfinə ziyafət verdi.