2023-cü il iyulun 27-də Başkent Universitetinin toplantı salonunda Bakıdan və Gürcüstandan gələn qonaqlarla rəsmi görüş keçirildi. Görüşdə Başkent Universitetinin rektoru, Prof. Dr. Haldun Müderrisoğlu, rektor yardımcıları: Prof. Dr. M. Abdülkadir Varoğlu, Prof. Dr. Füsun Eyidoğan, Tibb fakültəsinin dekanı Prof. Dr. Derya Akaydın-Aldemir, Eğitim fakültəsinin dekanı Prof. Dr. Sadegül Akbaba Altun, Uluslararası ilişkilər və dəyişim proqramları üzrə koordinatör İrem Aşçılı, Uluslararası xəstə departamentinin koordinatoru Dr. Turhan Namazov iştirak etdilər.

Başkent Universitetinin rektoru Prof. Dr. Haldun Müderrisoğlu Prof. Akad. Hamlet İsaxanlıya xitabən 2 ay öncə Bakı şəhərində olarkən ona və rəhbərlik etdiyi nümayəndə heyətinə göstərdiyi böyük qonaqpərvərlikdən dolayı təşəkkür etdi və Ankara şəhərində yenidən görüşməkdən məmnun olduğunu bildirərək, Başkent Universiteti haqqında geniş məlumat verdi. Universitetin fəaliyyətini əks etdirən film nümayiş olundu, professor-müəllim heyətinin əldə etdiyi nailiyyətlərdən danışıldı.

Xəzər Universitetinin təsisçisi, Direktorlar və Qəyyumlar Şurasının sədri, East-West Universitetinin qurucusu Prof. Akad Hamlet İsaxanlı Xəzər Universitetinin fəaliyyətli və Tbilisi şəhərində yeni yaradılmış East-West Universitetinin Tibb fakültəsi haqqında məlumat verdi. O, gələcəkdə hər iki universitetin fakültə, departament və digər bölümləri arasında əlaqələrin inkişaf etdiriləcəyinə, elmi və pedaqoji əlaqələrin qurulacağına əminliyini bildirdi.

Sonra Hamlet İsaxanlı Azərbaycana aid Dostluq Plaketini rektor Haldun Müderrisoğluna təqdim etdi. Haldun Müderrisoğlu da qarşılıqlı olaraq qonaqlara Başkent Üniversitetinin hədiyyələrini verdi. Səmimi keçən görüşdə East-West Üniversitetinin qurucusu Teimuraz Khurodze və Xəzər Üniversitetinin İctimai əlaqələr və media üzrə direktoru Əlövsət Əmirbəyli iştirak etdilər.