2023-cü il iyulun 17-21-də Erasmus+ İşçi Heyətinin Mübadilə Proqramı (KA171) çərçivəsində Portuqaliyanın Braqança Texniki Universitetinin (İnstituto Politécnico de Bragança) üç professoru - Hélder Teixeira Gomes (Kimya mühəndisliyi), António Borges Fernandes (Menecment) və Olena Dolid (Beynəlxalq əlaqələr şöbəsi) Xəzər Universitetində oldular.

Proqramın ilk günündə universitetin rektoru dosent İradə Xəlilova, Beynəlxalq əlaqələr üzrə prorektor Vlad Vernygora, İqtisadiyyat və menecment fakültəsinin dekanı Ceyhun Məmmədov, İqtisadiyyat və biznes yüksək təhsil fakültəsinin dekanı İnqilab Əhmədov, Neft mühəndisliyi departamentinin müdiri Elşən Abdullayev və Beynəlxalq əlaqələr ofisinin koordinatoru Fatimə Vəliyeva nümayəndə heyəti ilə görüşdülər və növbəti əməkdaşlıq imkanları müzakirə olundu.

Proqrama uyğun olaraq ətraflı müzakirələr aparılması üçün qonaqların fərdil şəkildə fakültələr ilə görüşləri keçirildi. İqtisadiyyat və menecment fakültəsində Ceyhun Məmmədov ilə António Borges Fernandes və Olena Dolid arasında işçi heyətinin mübadilə proqramlarında iştirakının artırılması istiqamətində müzakirələr və ortaq proqramlar haqqında danışıqlar aparıldı.

Neft mühəndisliyi departamentinin təşkilatçılığı ilə Xəzər Universitetində “Sukanal” Elmi-Tədqiqat və Layihə İnstitutunun əməkdaşları ilə görüş keçirildi. Görüşdə rektor İradə Xəlilova, departament müdiri Elşən Abdullayev, Fatimə Vəliyeva, Braqança Texniki Universitetinin professorları iştirak etdilər. İnstitutun əməkdaşı Cavid Rəhmanlının “Tullantı sularının və aktiv lilin səmərəli idarə edilməsi” mövzusunda, Elşən Abdullayevin isə “Kür çayının suyunun kimyəvi tərkibi” haqqında çıxışları oldu.

İyul ayının 20-də institutun direktor müavini Dr.Elnur Nəsirov, Elşən Abdullayev və Braqança Texniki Universitetinin nümayəndə heyəti Kür çayının çöküntülərindən və sahildəki torpaqdan nümunələr götürmək üçün Zərdab rayonuna səfər etdilər.

Kitabxana İnformasiya Mərkəzinin direktor müavini Aytac Misgərli qonaqları mərkəzin fəaliyyəti ilə tanış etdi. Nailəxanım Mədəniyyət Mərkəzində onlara görkəmli pedaqoq Nailəxanım İsayevanın həyat və fəaliyyətini əks etdirən eksponatlar haqqında məlumat verildi.

Proqrama uyğun olaraq, Elşən Abdullayev və portuqaliyalı professorlar “Azərsu”nun mərkəzi laboratoriyasına səfər etdilər və nəzərdə tutulan layihə müzakirə edildi.

Proqramın son günündə Beynəlxalq əlaqələr ofisinin təşkilatçılığı ilə qonaqlar Abşeron Milli Qoruğuna aid olan Zirədəki “Şah dili”ndə oldular.

Proqramın yekunu olaraq, qonaqlar Beynəlxalq əlaqələr üzrə prorektor Vlad Vernygora və İqtisadiyyat və menecment fakültəsinin dekanı Ceyhun Məmmədov tərəfindən sertifikatla təltif edildilər.