2023-cü il iyunun 1-2-də Xəzər Universitetində 3-cü beynəlxalq “Vahid Sağlamlıq: Problemlər və Həllər” konfransı keçirildi.

Konfrans Planetary Health Alliance (PHA) konsorsiumunun üzvü olaraq Xəzər Universitetinin təşkilatçılığı, habelə Azərbaycan Tibb Universiteti, Vəli Axundov adına Azərbaycan Milli Elmi-Tədqiqat Tibbi Profilaktika İnstitutu, Azərbaycan Respublikasının Qida Təhlükəsizliyi Agentliyi, İsveç Kənd Təsərrüfatı Elmləri Universitetinin (SLU) Molekulyar elmlər departamentinin Heyvan Rifahı Mərkəzi, Ukrayna Milli Həyat və Ətraf Mühit Elmləri Universitetinin Heyvandarlıq və Su Bioresursları fakültəsi və Ukraynanın Poltava Dövlət Aqrar Universitetinin həmtəşkilatçılığı ilə təşkil edilmişdir.

Konfrans planetimizdə müharibələr, təbii fəlakətlər və aclıq qurbanı olmuş uşaqların xatirəsinin bir dəqiqəlik sükutla yad edilməsi ilə başlamışdır. Sonra universitetin təsisçisi, Direktorlar və Qəyyumlar Şurasının sədri professor Hamlet İsaxanlı və konfransın sədri dosent İradə Xəlilova salamlama nitqi ilə konfransın açılışını etdilər. Daha sonra Planetary Health Alliance (PHA) konsorsiumunun konfrans üçün göndərdiyi salamlama videosu konfrans iştirakçılarına təqdim edildi.

Konfransın İqlim dəyişilmələri, Sağlamlıq və Qida təhlükəsizliyi sessiyası konfransın sədri dosent İradə Xəlilovanın və Dr. David Dyjack`ın moderatorluğu ilə aparıldı. Sessiyada Planetary Health Alliance (PHA) konsorsiumundan Dr. David T. Dyjack, Xəzər Universitetinin Coğrafiya və ətraf mühit  departamentinin müdiri Rövşən Abbasov, İsveç Kənd Təsərrüfatı Elmləri Universitetinin dosenti Qalia Zamaratskaia əsas məruzəçilər qismində, habelə Ukrayna, Tacikistan, Türkiyə, Çin və Azərbaycandan olan digər məruzəçilər çıxış etdilər. Sessiyanın sonunda Şenzen Universitetinin və Springer Nature əməkdaşları tərəfindən iki təlim təqdimatı edildi.

Konfransın ikinci günündə Texas at Taylor Universitetinin professoru Əli Azqani`nin və konfransın sədri İradə Xəlilovanın moderatorluğu ilə İctimai səhiyyə, xəstəliklərin kontrolu və qarşısının alınması strategiyaları sessiyası baş tutdu. Sessiyada əsas məruzəçi kimi Çinin Shanghai Universitetinin Pan-SHU Sci-Tech Parkının baş direktor müavini professor Lu Xiaolin, Shenzhen Universitetinin tibb fakültəsinin dekanı professor Xingzhi (Xavier) Xu və müavini professor Xinchun Chen, Fudan Universitetinə bağlı Minhang Hospitalının  İntensiv Terapiya departamentinin direktor müavini professor Jiang Lijing və Texas at Taylor Universitetinin professoru Əli Azqani əsas məruzəçi qismində çıxış etdilər. Daha sonra Türkiyə, Qazaxıstan, Amerika Birləşmiş Ştatları və Azərbaycandan olan tədqiqatçıların məruzələri dinlənildi.

Konfransda yuxarıda adları sadalanan ölkələrdən 80-dən çox tədqiqatçı dinləyici kimi iştirak etdi. İki günlük konfransda ümumilikdə 34 təqdimat baş tutdu, 50-yə qədər məruzə xülasəsi təqdim olundu.

Memarlıq və Dizayn departamentinin tələbələri konfransda fəal iştirak edərək təbiətin mühafizəsini təbliğ etmək məqsədilə İqlim Dəyişikliyi və Ekosistem Sağlamlığı mövzusunda öz posterlərini təqdim etdilər.

Konfransın sonunda Çinin Shenzhen Universitetinin Tibb fakültəsinin dekanı professor Xingzhi (Xavier) Xu öz universiteti haqqında təqdimat edərək, Shenzhen Universitetinin Tibb fakültəsinə tam təqaüdlə biologiya ixtisası üzrə doktoranturaya seçilərək qəbul olmuş Xəzər Universitetinin 4 bakalavr tələbəsini elan etdi və təqaüdlərin mükafatlandırma mərasimi baş tutdu. Sonda Çinin Shenzhen Universitetinin Tibb fakültəsi ilə Xəzər Universiteti arasında əməkdaşlığın müxtəlif istiqamətləri üzrə  Anlaşma Müqaviləsi imzalandı.

Konfransın keçirilməsinə Azərbaycanda laboratoriyaların qurulması və treyninq xidmətlərinin verilməsində qabaqcıllardan olan Bayramlı Group LLC tərəfindən sponsorluq edilmişdir.