2023-cü il mayın 8-də Xəzər Universitetində İsveçrənin turizm, otelçilik və turizm menecmenti sahəsində aparıcı şirkətlərindən olan “SHG Swiss Hospitality Group” ilə görüş keçirildi. Görüşdə Xəzər Universitetinin təsisçisi, Direktorlar və Qəyyumlar Şurasının sədri professor, akademik Hamlet İsaxanlı, universitetin rektoru dosent İradə Xəlilova, Beynəlxalq əlaqələr üzrə prorektor Vlad Vernygora, İqtisadiyyat və menecment fakültəsinin dekanı Ceyhun Məmmədov, İqtisadiyyat və biznes yüksək təhsil fakültəsinin dekanı İnqilab Əhmədov, İqtisadiyyat və menecment departamentinin koordinatoru Bahadır Baysal, “SHG Swiss Hospitality Group”un direktoru Eric Gregoire, Biznesin İnkişafı üzrə direktor Attia Elrefaei və professor Ahmed Sami iştirak etdilər.

Görüşdə “SHG Swiss Hospitality Group” nümayəndələrinə Xəzər Universiteti haqqında ətraflı məlumat verildi, Qonaqpərvərlik və Turizm Menecmenti (Hospitality Management and Business Management) sahəsində bakalavr və MBA təhsili üzrə əməkdaşlıq müzakirə olundu. Tərəflər birgə əməkdaşlığın qurulmasında maraqlı olduqlarını bildirdilər. Bu məqsədlə danışıqların davam etdirilməsi və növbəti görüşlərin keçirilməsi qərara alındı.