2023-cü il mayın 8-12-də Türkiyənin İstanbul Aydın Universiteti Ümumi şöbəsinin müdir müavini Serkan Yolsal, Kütahya Dumlupınar Universitetinin Siyasət departamentinin tədqiqatçısı Selman Saç və Manisa Celal Bayar Universitetinin Biznes fakültəsinin tədqiqatçısı Gencay Tepe Erasmus+ İşçi Heyətinin Mübadilə Proqramı (Erasmus+ KA107171) çərçivəsində Xəzər Universitetinin Humanitar, təhsil və sosial elmlər fakültəsi, İqtisadiyyat və menecment fakültəsi və Beynəlxalq əlaqələr ofisi tərəfindən qəbul edildilər.

Proqramın ilk günü Beynəlxalq əlaqələr üzrə prorektor Vlad Vernygora, İqtisadiyyat və menecment fakültəsinin dekanı Ceyhun Məmmədov, İctimai əlaqələr və media üzrə direktor Əlövsət Əmirbəyli, İngilis dili və ədəbiyyatı departamentinin müdiri Milana Abbasova, Kitabxana İnformasiya Mərkəzinin (KİM) direktor müavini Aytac Misgərli, Beynəlxalq əlaqələr ofisinin koordinatorları Fatimə Vəliyeva, Arzu Bədəlova və Turan Əlizadənin iştirakı ilə türkiyəli professor-müəllim heyəti ilə tanışlıq görüşü keçirildi. Görüşdə Vlad Vernygora Xəzər Universiteti haqqında geniş məlumat verdi. Universitetlərin nümayəndələri öz universitetləri haqqında videoçarx nümayiş etdirdilər.

Proqrama uyğun olaraq KİM-in direktor müavini Aytac Misgərli qonaqları mərkəzin fəaliyyəti ilə tanış etdi. Nailəxanım Mədəniyyət Mərkəzində onlara görkəmli pedaqoq Nailəxanım İsayevanın həyat və fəaliyyətini əks etdirən eksponatlar haqqında ətraflı məlumat verildi. Sonra Fizika və elektronika departamentinin müdiri Fəridə Tatardar qonaqları departament və laboratoriyanın fəaliyyəti ilə tanış etdi.

Proqramın ikinci günündə Siyasi elmlər və fəlsəfə departamentinin müdiri Orxan Vəliyev ilə görüş keçirildi və qonaqlar departament haqqında ətraflı məlumat aldılar. Departamentin müəllimi Baba Bayramovun “Avropa ölkələrinin etnopsixologiyası“ dərsində dinləyici olaraq iştirak etdilər və tələbələrə çalışdıqları universitet və onun proqramları haqqında məlumat verdilər.

Sonra qonaqlar “Atəşgah məbədi” Dövlət Tarix-Memarlıq Qoruğunda ekskursiyada oldular. Ekskursiyada Xəzər Universitetinin Erasmus+ tələbə mübadilə proqramı ilə İstanbul Aydın Universiteti və Manisa Celal Bayar Universitetində 1 semestrlik təhsil alan tələbələr - Əsmər Paşayeva və Sima Rəhimova da iştirak etdilər.

Növbəti günlərdə İqtisadiyyat və menecment fakültəsində dekan Ceyhun Məmmədov fakültənin fəaliyyəti haqqında məlumat vermiş və iki universitet arasında departamentlərarası əməkdaşlıq istiqamətində danışıqlar aparmışdır.

Qonaqlar Humanitar, təhsil və sosial elmlər fakültəsində olmuş, dekan Elza Səmədova fakültənin fəaliyyət istiqamətləri haqqında məlumat vermiş və əməkdaşlıq məsələsi müzakirə olunmuşdur. Beynəlxalq əlaqələr ofisi ilə də tanış olan nümayəndə heyətinə ofisin koordinatorları ofis və onun fəaliyyəti haqqında məlumat vermişlər.

Proqramın sonunda nümayəndə heyətinə sertifikat və hədiyyə təqdim edilmişdir.