2023-cü il aprelin 15-də Azərbaycan Hotel Assosiasiyası (AHA) tərəfindən Dövlət Turizm Agentliyi, Dövlət Məşğulluq Agentliyi və Peşə təhsili üzrə Dövlət Agentliyinin əməkdaşlığı ilə qonaqpərvərlik sahəsində iş axtaran tələbə və məzunlar üçün karyera günü keçirildi. AHA-ya üzv olan 47 hotel və şirkət tədbirə vakansiya və təcrübə proqramları ilə qatıldı.

Karyera günündə ümumilikdə müxtəlif universitet və peşə məktəblərinin tələbə və məzunları, Dövlət Məşğulluq Agentliyi tərəfindən yönləndirilən 800 şəxs işaxtaran qismində iştirak etdi. Ənənəvi karyera günlərindən fərqli olaraq, tədbir çərçivəsində qonaqpərvərlik üzrə ustad dərsləri təşkil olundu.

AHA-ya üzv olan hotellərin təmsilçiləri tərəfindən müxtəlif mövzularda təqdimatlar və interaktiv sessiyalar keçirildi.

Karyera gününə Xəzər Universiteti Karyera Mərkəzinin əməkdaşı Mustafa Həsənli və universitetin tələbə və məzunları da qatılmışdı. Sonda tələbə və məzunlar öz sahələri üzrə müvafiq şirkətlərdə iş və ya təcrübəyə qəbul olmaq üçün müraciət etdilər.