2023-cü il aprelin 3-7-də İspaniyanın Mursiya şəhərində yerləşən San Antonio Katolik Universitetinin əməkdaşı Almudena Vicente Aranda Erasmus+ İşçi heyətinin Mübadilə Proqramı (KA 107171, Training Mobility) çərçivəsində Xəzər Universitetinin Beynəlxalq əlaqələr ofisi tərəfindən qəbul edildi.

Proqramın ilk günü ofisin əməkdaşları ilə tanışlıq görüşü keçirildi. Görüşdə Beynəlxalq əlaqələr ofisinin koordinatoru Fatimə Vəliyeva tərəfindən Xəzər Universiteti haqqında təqdimat və Azərbaycanın görməli yerləri haqqında tanıtım videoçarxı göstərildi. San Antonio Katolik Universitetinin əməkdaşı da təmsil etdiyi universitet haqqında təqdimatla çıxış etdi.

Proqrama uyğun olaraq universitetin Kitabxana İnformasiya Mərkəzində direktor Tatyana Zaytseva və direktor müavini Aytac Misgərli qonağa mərkəzin fəaliyyəti haqqında məlumat verdilər. Nailəxanım Mədəniyyət Mərkəzində o, Nailəxanım İsayevanın həyat və fəaliyyətini əks etdirən eksponatlarla tanış oldu. Neft mühəndisliyi departamentinin müdiri Elşən Abdullayev qonağı departamentin fəaliyyəti ilə tanış etdi.

Siyasi elmlər və fəlsəfə departamentinin müdiri Orxan Vəliyev ilə görüş keçirildi və qonaq departament haqqında ətraflı məlumat aldı. Almudena Vicente Aranda Siyasi elmlər və fəlsəsə departamentinin müəllimi Baba Bayramov ilə görüşdü, onun “Beynəlxalq Əlaqələrin Tarixi“ dərsində dinləyici olaraq iştirak etdi və tələbələrə çalışdığı universitet və onun proqramları haqqında məlumat verdi.

Proqramın növbəti günündə Beynəlxalq əlaqələr üzrə prorektor Vlad Vernygora tərəfindən “Ali təhsil müəssisələrində beynəlmiləlləşmə” mövzusunda vörkşop keçirildi.

Səfərin son günündə qonaq “Atəşgah məbədi” Dövlət Tarix-Memarlıq Qoruğunda ekskursiyada oldu.

Proqramın sonunda Beynəlxalq əlaqələr üzrə prorektor tərəfindən Almudena Vicente Aranda`ya sertifikat və hədiyyə təqdim edildi.