2023-cü il martın 27-də Xəzər Universitetinin Humanitar, təhsil və sosial elmlər fakültəsində MUSLIM İnstitutunun əməkdaşı Asef Tanveer Awanla görüş keçirilmişdir. Humanitar, təhsil və sosial elmlər fakültəsinin dekanı dosent Elza Səmədova, Siyasi elmlər və fəlsəfə departamentinin müdiri Dr.Orxan Vəliyev və Humanitar, təhsil və sosial elmlər fakültəsinin dekan müavini Tərlan Orucovanın iştirak etdiyi görüşdə gələcək əməkdaşlığın təməli qoyulmuş, mədəniyyət, ədəbiyyat, beynəlxalq münasibətlər və digər mövzularda tədbir və konfransların keçirilməsi, birgə tədqiqatların aparılması, həmçinin mübadilə proqramlarının təşkili ilə bağlı fikir mübadiləsi aparılmışdır.

Qeyd edək ki, MUSLIM İnstitutu baş ofisi İslamabadda yerləşən tədqiqat institutudur. İnstitutun əsas məqsədi bütün dünyada, eləcə də müsəlman dünyasında sülhün və rifahın təşviqidir. MUSLIM İnstitutu tərəfsiz və azad tədqiqatlar apararaq, nəticələri müxtəlif məqalələr, hesabatlar, brifinqlər şəklində ictimaiyyətlə bölüşür, dünyada artan islamofobiya təzahürlərinin qarşısını almağa çalışır.