2023-cü il martın 15-də Bakı Yunus Əmrə İnstitutunun direktoru Selçuk Karakılıç Xəzər Universitetində müəllimlər və Humanitar, təhsil və sosial elmlər fakültəsinin bir qrup tələbəsi ilə görüşdü.

Görüşü fakültənin dekanı dosent Elza Səmədli açaraq, qonağı təqdim etdi. S.Karakılıç Yunus Əmrə İnstitutunun Bakıdakı fəaliyyəti haqqında məlumat verərək bildirdi ki, institut təhsil və tədrislə yanaşı, türk mədəniyyətinin, tarixinin, dilinin və ədəbiyyatının daha yaxşı təbliği və öyrədilməsi məqsədi ilə tədqiqatlar aparmaq, fərqli təşkilatlarla əməkdaşlıq edərək elmi işləri dəstəkləmək və əldə edilən nəticələri ictimaiyyətə çatdırmaq üçün müxtəlif fəaliyyətlər həyata keçirir. O, institutun Xəzər Universiteti və daha bir neçə ali təhsil müəssisəsi ilə əməkdaşlıq etdiyini söylədi. Sonra Türkiyə universitetləri ilə əlaqələrin əhəmiyyəti və yeni imkanlar haqqında da müzakirələr aparıldı, maraqlı təkliflər və layihələr irəli sürüldü.

Sonda Bakı təəssüratlarını iştirakçılarla bölüşən S.Karakılıç tələbə və müəllim heyətinə institutun hədiyyələrini təqdim etdi.