2023-cü il martın 1-də Xəzər Universitetinin Mərmər salonunda İKSAD-ın (İqtisadi İnkişaf və Sosial Tədqiqatçılar İnstitutu) təşkilatçılığı ilə Xəzər Universitetinin təsisçisi, Direktorlar və Qəyyumlar Şurasının sədri professor, akademik Hamlet İsaxanlının 75 illik yubileyinə həsr olunan ikigünlük beynəlxalq elmi konfrans işə başladı. Tədbirdə universitetin rəhbərliyi və əməkdaşları, müxtəlif elm sahələrinin mütəxəssisləri iştirak edirdilər.

Konfransın ilk geniş iclası H.İsaxanlının yubileyinə həsr olundu. İKSAD-ın baş koordinatoru Əlvan Cəfərov konfransı açaraq, ilk sözü H.İsaxanlıya verdi. H.İsaxanlı elm tarixi və elmin bəşəriyyətə töhfələri mövzusunda çıxış etdi.

İKSAD-ın prezidenti Mustafa Latif Emek onlayn formatda H.İsaxanlını yubileyi münasibətilə təbrik etdi və ona uğurlar arzuladı.

Xəzər Universitetinin rektoru İradə Xəlilova H. İsaxanlı haqqında təbrik nitqi söylədi və ona universitet adından hədiyyə hazırlandığını bildirdi. Universitetin Memarlıq və dizayn departamentinin müəllimi Həsənağa Həsənov H.İsaxanlının yubileyinə həsr etdiyi “Poeziya işığında” adlı qrafik rəsmini H.İsaxanlıya təqdim etdi.

İKSAD-ın baş koordinatoru Əlvan Cəfərov da H.İsaxanlıya və İ.Xəlilovaya İKSAD-ın hədiyyələrini çatdırdı.

Konfrans hibrid formatda işini davam etdirmişdir.