Xəzər Universiteti Tarix və arxeologiya departamentinin müdiri Telman Nüsrətoğlu Azərbaycanda bir çox cəmiyyət və QHT-lərin bir araya gələrək, Türkiyədəki dağıdıcı zəlzələdən zərər görən insanlara yardım etmək üçün təsis etdikləri "Qardaş köməyi" platformasının təmsilçisi kimi 2023-cü il fevralın 20-23-də zəlzələ bölgələri Xatay, Malatya, Elbistan, Kahramanmaraş və Adyamanıda olmuşdur.

Departament müdirinin də içində yer aldığı heyət səfər zamanı Türkiyənin Daxili İşlər naziri Süleyman Soylu başda olmaqla bölgədə vəzifə icra edən valilər, bələdiyə başqanları və AFAD rəhbərləri ilə görüşmüş, dövlət adamları, media nümayəndələri və zəlzələdən zərər çəkən insanlara Azərbaycan-Türkiyə qardaşlığı, Azərbaycan xalqının və dövlətinin zəlzələnin ilk saatlarından etibarən zəlzələnin nəticələrinin ortadan qaldırılması üçün qardaşlıq ruhuyla səfərbər olması barədə məlumat verilmişdir. Türkiyədəykən T.Nüsrətoğlu Türk mediasına XX əsrin əvvəllərində Azərbaycan ziyalılarının, ictimai xadimlərinin qurduğu cəmiyyətlərin də Balkan və Birinci Dünya müharibələri zamanı Anadoludakı soydaşlarımıza yardım zamanı əsas şüar olan "Qardaş köməyi" haqqında da danışmışdır.