Azərbaycanın qeyri-hökumət təşkilatlarının (QHT) nümayəndələri Şuşada Rusiya sülhməramlılarının postunun yaxınlığında azərbaycanlı mütəxəssislərin yataqların qeyri-qanuni istismarı ilə bağlı monitorinq aparmaq üçün əraziyə buraxılmamalarına qarşı etiraz aksiyası keçirirlər. Qeyd edək ki, Laçın-Xankəndi yolunda baş verən “Ekoloji terrora YOX deyək!” aksiyası hələ də davam edir.

Həmin aksiyada Xəzər Universitetinin İqtisadiyyat və menecment fakültəsinin tələbəsi, “Əbədi Birlik” Gənclər İctimai Birliyinin sədri Şahin Əliyev də iştirak edib.

Şahin Əliyev deyir: “Artıq Bakıdayam. Mübarək Şuşamızdakı haqlı mübarizədə iştirak etmək mənim üçün qürurverici və fəxr ediləsi bir mərhələ oldu. Biz dinc şəkildə sadəcə öz haqqımızı tələb edirik, dünyadan da bu haqlı davada bizim yanımızda olmasını istəyirik. Vətən şirindir, Vətən üçün lazım gəlsə canımızı, qanımızı da verməyə hazırıq. Gələcəkdə Azərbaycanın vətənpərvər gəncliyinin Vətən uğrundakı mübarizəsini tarix kitablarında görəcəyümüzü düşünəndə, insan daha da mübariz olur.

Hələ cənab Prezidentin biz gənclərə təşəkkür mesajını demirəm. O təşəkkür ki, bizdəki vətənpərvərlik hisslərini daha da gücləndirdi, motivasiyamız, enerjimiz ən pik səviyyəyə çatdı. Burada Emin adlı bir qazi qardaşımız bizə: “Sizinlə fəxr edirəm, mən Aprel döyüşlərində, II Qarabağ müharibəsində iştirak etdim. Qələbə qazandıq. Sizdəki əzmi gördüyümdə daha da sevinirəm” - dedi. Bu sözləri eşidib necə fəxr etməyəsən axı?!

Hal-hazırda estafeti ötürdüyümüz, Laçın-Xankəndi yolunda iştirak edən bütün qardaş-bacılarımıza əzm, mübarizlik və dözüm arzu edirəm. Biz bacaracağıq, çox yaxın zamanda mübarək bayrağımızı Xankəndidə dalğalandıracağıq.

Bir olandan gülür vətən,
Gün mübarizədə ötər.
Torpağıma dəymə, düşmən,
Burda xarı bülbül bitər.

Vətənimin, dövlətimin, xalqımın yanındayam!”