2023-cü il yanvarın 9-da Yunus Əmrə İnstitunun Bakı nümayəndələyində Xəzər Universitetinin təsisçisi, Direktorlar və Qəyyumlar Şurasının sədri professor, akademik Hamlet İsaxanlının 75 illik yubileyi münasibətilə "Mənim Qarabağım və ya Qarabağ düyünü” adlı kitabının təqdimatı olub. Tədbirdə Yunus Əmrə İnstitutu Bakı nümayəndəliyinin, Xəzər Universitetinin rəhbərliyi və əməkdaşları, Türkiyə və Azərbaycan mətbuat nümayəndələri, ictimai xadimlər, mədəniyyət və elm nümayəndələri iştirak edib. Yunus Əmrə İnstitunun Bakı nümayəndələyinin rəhbəri Selçuk Karakılıç çıxış edərək, kitab və müəllifi haqqında fikirlərini bildirib: "Hamlet İsaxanlı məktəb qurucusu kimi insan yetişdirmə və təhsil məsələlərində Azərbaycanın ən mühüm fəaliyyət göstərən simalarından biridir. Bəzi insanlar var ki, onların varlıq səbəbi yalnız bəşəriyyətə xidmət etmək, yəni insan yetişdirməkdir. Qəlbində dərin insan sevgisi ilə doğulan bu cür yaradıcı insanlar sırf "qurmaq və yaratmaq" üçün dünyaya gəliblər. Onların daxili aləmində yıxmaq və dağıtmaq, ədəbiyyatlarında uyğunsuz düşüncə və ya mənfilik yoxdur, əksinə, müsbət düşünməklə, günəşin hər cür təsir altında yenidən doğacağına inanaraq, yeni nələrsə yaradacaqlarından əmindirlər. Gecəsini gündüzünə qataraq, Azərbaycan xalqını bütün dünyada qlobal səviyyəyə yüksəltmək, onu düzgün yetişdirmək istəyənlərdən biri də Hamlet İsaxanlı idi. Qurduğu məktəblər, universitet və yazdığı kitablarla hələ də söz söyləməyə, insanları yetişdirməyə davam edir. Onu fərqli və dəyərli edən yüksək intellekti və dünyada baş verənləri qavramasıdır. Hamlet İsaxanlı orijinal və qeyri-adi bir ziyalı kimi, qəlbi mərhəmət və elm müdrikliyi ilə dolu olan Azərbaycanın əfsanəvi portretidir".
Selçuk Karakılıç onu da deyib ki, kitab Qarabağ həqiqətlərinin dünya ictimaiyyətinə çatdırılmasında önəmli mənbə rolunu oynayacaq.
Kitabın müəllifi Hamlet İsaxanlı kitabın yaranma tarixindən danışıb: "Ürəkdən gələn bir işdir. Kitabı Azərbaycan və ingilis dilində yazmışam. İlk olaraq ingilis dilində nəşr edilib. Rus dilinə isə tərcüməçilər tərcümə edirlər. Qarabağ haqqında çox yazıblar və yazacaqlar. Əsas məqsədim bundan ibarət idi ki, mümkün qədər obyektiv yanaşım. Kitabı yazanda etibarlı qaynaqlara müraciət etdim. Gözəl Qarabağ Azərbaycan və Ermənistan, azərbaycanlı və ermənilər arasında gərginliyə, qarşıdurma meydanına, düşmənçiliyin alovlanmasına və savaşlara səbəb oldu. Bu necə oldu? Niyə belə oldu? Nə durur bu məsələnin kökündə? Çıxılmaz vəziyyət, açılmayan düyün necə əmələ gəldi? Düyünü necə açmaq olar? Bu və bənzər suallar, həmçinin 2020-ci ilin payızında baş verən İkinci Qarabağ savaşı ətrafında düşüncələr məni bu yazı üzərində işləməyə çağırdı".
Kitabın təqdimatı müzakirələrlə başa çatıb.
Ölkə saytları tədbir haqqında xəbər yayımlamışdır.
https://teleqraf.com/news/gundem/363211.html
https://news24.az/96065-hamlet-saxanlinin-kitabinin-teqdimat-merasimi-kechirildi.html
Copyright © Xəzər Universiteti, 2025
