Xəzər Universiteti Təbiət elmləri və mühəndislik fakültəsinin dekanı Dr. Fəxrəndə Əfəndiyeva Erasmus+ İşçi Heyətinin Mobilliyi (KA107) layihəsi çərçivəsində dekabrın 19-23-də Türkiyənin Ankara şəhərində Gazi Universitetində səfərdə olub.

Səfərin ilk günü Təhsil fakültəsinin Riyaziyyat və Biologiya müəllimliyi ixtisaslarının professor-müəllim heyəti ilə görüş olmuşdur. Görüş zamanı təhsil proqramları, birgə əməkdaşlıq üzrə müzakirələr aparılmış, Biologiya ixtisası üzrə mövcud laboratoriyalara baxış olmuşdur.

Səfərin ikinci günü Texnologiya fakültəsinin dekanı Prof. Dr. Süleyman Tekeli və fakültənin Kompüter mühəndisliyi, Elektrik və Elektronika mühəndisliyi, Mexanika mühəndisliyi, İnşaat mühəndisliyi departamentlərinin rəhbər və professor-müəllim heyəti ilə görüş olmuşdur. Görüş zamanı ikili diplom, ERASMUS proqramı vasitəsilə müəllim və tələbə mübadiləsi proqramları və birgə layihələrin reallaşdırılması ətrafında müzakirələr aparılmış, laboratoriyalarla tanışlıq olmuşdur.

Səfərin üçüncü günü Mühəndislik fakültəsinin Kompüter mühəndisliyi, Elektrik və Elektronika mühəndisliyi, Mexanika mühəndisliyi, İnşaat mühəndisliyi və Kimya mühəndisliyi departamentlərinin rəhbər və professor-müəllim heyəti ilə görüşlər olmuş və müzakirələr aparılmışdır.

Sonuncu gün Gazi Universiteti İnformatika institutunun rəhbəri Dos. Dr. Murat Yilmaz ilə görüş olmuş və Kompüter mühəndisliyi ixtisası üzrə magistr, doktorantura təhsili pilləsində ERASMUS proqramı vasitəsilə tələbə mübadiləsi proqramlarının reallaşdırılması və birgə tezis işlərinin görülməsi ətrafında söhbətlər aparılmış və bu istiqamətdə sənədin hazırlanıb yaxın zamanda imzalanması razılaşdırılmışdır.

Səfər zamanı, həmçinin, Türkiyənin Orta Doğu Texnik Universitetinin Mühəndislik fakültəsinin dekanı Prof. Dr. Tuna Balkan və Hacettepe Universitetinin Mühəndislik fakültəsinin dekanı Prof.Dr. Halil Vural ilə də görüşlər olmuş və qarşılıqlı əməkadaşlıq imkanları müzakirə olunmuşdur.