2022-ci il dekabrın 14-də Xəzər Universitetinin Tarix və arxeologiya departamentinin müəllimi, t.ü.f.d. Yaqub Məmmədovun rəhbərliyi ilə Humanitar, təhsil və sosial elmlər fakultəsinin Tarix müəllimliyi (II kurs) və Tarix-Coğrafiya müəllimliyi ixtisasında təhsil alan (l kurs) tələbələri AMEA-nın Arxeologiya, Etnoqrafiya və Antropologiya İnstitutunun keçirdiyi “Daş təpələr: sivilizasiyanın erkən coğrafiyası” mövzusunda (Türkiyənin Şanlıurfa şəhəri yaxınlığında yerləşən “Göbəklitəpə” arxeoloji abidəsinə həsr olunmuş dünyanın mədəni irsi silsiləsindən) seminarda iştirak ediblər.
Seminarda İstanbul Universitetinin Arxeoloji bölümündə “Tarix öncəsi arxeologiyası” departamentinin müdiri, Türkiyə Respublikası Mədəniyyət və Turizm Nazirliyi tərəfindən təyin olunmuş “Daş təpələr” layihəsinin ümumi rəhbəri Prof. Dr. Necmi Karul “Daş təpələr layihəsi: Göbəklitəpə və Karahantəpə qazıntıları” və həmin departamenin əməkdaşı Doç.Dr. Eylem Özdoğan isə “Sayburc – Şanlıurfada yeni Neolit abidəsinin kəşfi” mövzularında məruzələrlə çıxış ediblər.
Sonra mövzuya aid müzakirələr aparılmış, suallar cavablandırılmışdır.