2022-ci il dekabrın 13-də Türkiyə Cümhuriyyəti Gənclər və İdman Nazirliyi Kırşehir rayon rəhbərliyi və gənc könüllülər Xəzər Universitetində oldular.

Qonaqlar ilk öncə Nailəxanım Mədəniyyət Mərkəzini ziyarət etdilər.

Sonra Universitetin Mərmər salonunda qonaqlarla universitet rəhbərliyinin ədəbi-bədii görüşü keçirildi. Görüşdə Xəzər Universitetinin rektoru İradə Xəlilova, Tədris işləri üzrə prorektor Məhəmməd Nuriyev, İdarəetmə və tələbə işləri üzrə prorektor İsaxan İsaxanlı, Beynəlxalq əlaqələr üzrə prorektor Vlad Vernygora, İctimai əlaqələr və media üzrə direktor Əlövsət Əmirbəyli, Humanitar, təhsil və sosial elmlər fakültəsinin dekanı Elza Səmədova, İqtisadiyyat və menecment fakültəsinin dekanı Ceyhun Məmmədov, Təbiət elmləri və mühəndislik fakültəsinin dekanı Fəxrəndə Əfəndiyeva, Beynəlxalq əlaqələr ofisinin koordinatoru Fatimə Vəliyeva və digər departamentlərin nümayəndələri iştirak etdilər.

Rektor İradə Xəlilova Xəzər Universitetinin qonağı olan Türkiyəli heyəti salamladı, onlara universitet haqqında geniş məlumat verdi.

Türkiyə Cümhuriyyəti Gənclər və İdman Nazirliyi Kırşehir rayon rəhbəri Numan Şahin, şöbə müdiri Aslan Uçar, layihə rəhbəri Hakan Avşar və könüllüləri geniş təqdimatla şıxış etdilər.

Xəzər Universitetinin Kamera orkestri böyük sənətkar Üzeyir Hacıbəyovun əsərlərini səsləndirdi, universitetin qızlardan və oğlanlardan ibarət rəqs ansamblı Azərbaycan və türk rəqsləri ilə qonaqları heyrətləndirdi.

Türkiyə Cümhuriyyəti Gənclər və İdman Nazirliyi Kırşehir rayon rəhbəri Numan Şahin çıxış edərək, Xəzər Universitetinin rəhbərliyinə qonaqpərvərliyə görə dərin təşəkkürünü bildirdi və rektor İradə Xəlilovaya təşəkkür plaketi, hədiyyələr təqdim etdi.

Universitetin İctimai ılaqələr və media üzrə direktoru Əlövsət Əmirbəyli çıxış edərək, “Türkiyə-Azərbaycan Gənclərinin Mübadiləsi, proqramı çərçivəsində 5 gün Xəzər Universitetinin qonağı olacaq Kırşehirli qonaqlar haqqında məlumat verdi.

Proqram çərçivəsində qonaqlar Beynəlxalq əlaqələr ofisinin koordinatoru Fatimə Vəliyavanın rəhbərliyi ilə Bakının görməli yerləri ilə tanış olacaq, Şəhidlər Xiyabanını, Bakı Türk Şəhidliyini ziyarət edəcəklər.

Yeni ilin yanvar ayında “Türkiyə-Azərbaycan Gənclərinin Mübadiləsi” proqramı çərçivəsində Xəzər Universitetinin tələbələri Kırşehir, Nevşehir, Kapadokya və Ankaraya səfər edəcəklər.

Səfər proqramı 5 gün davam edəcək.

Tədbirdən sonra Xəzər Universitetinin təsisçisi, Direktorlar və Qəyyumlar Şurasının sədri professor, akademik Hamlet İsaxanlı qonaqları qəbul etdi. Səmimi tanışlıq və söhbət şəraitində keçən görüşdə Numan Şahin Hamlet İsaxanlıya hədiyyə təqdim etdi və təşəkkürünü bildirdi.