2022-ci il noyabrın 23-25-də Xəzər Universiteti, Azərbaycan Turizm və Menecment Universiteti və MİRAS İctimai Birliyinin tərəfdaş olduğu Erasmus+ PİCASP layihəsi çərçivəsində xarici nümayəndələrlə görüş keçirilib.
Görüş Xəzər Universiteti və Azərbaycan Turizm və Menecment Universitetində Təcrübə müəssisəsi dərslərinin təşkili və Vilnüs Gediminas Texniki Universiteti və SERİNAR-ın bu prosesə cəlb edilməsinə həsr olunmuşdu.
Görüşdə Litva Tədqiqat Şurasının üzvü, Vilnüs Gediminas Texniki Universitetinin professoru Arturas Kaklauskas, Layihənin koordinatoru, İtaliyanın Bolonya Biznes Menecmenti Universitetinin professoru Massimo Bianchi və İqtisadiyyat və İdarəetmə Məktəbinin tədqiqatçısı Gabriella Paganelli iştirak edib.
Noyabrın 23-də Azərbaycan Turizim və Menecment Universitetində keçirilən görüşdə nümayəndələr və müəllimlər arasında layihənin inkişaf prosesi barədə müzakirələr aparılıb.
Noyabrın 24-25-də Xəzər Universitetində olan nümayəndələrlə əvvəlcə Erasmus+ PİCASP layihəsi çərçivəsində aparılan fəaliyyətlər müzakirə edilib və “MOOC” (kütləvi şəkildə açıq onlayn dərslər) tədris edəcək müəllimlərlə görüş keçirilib.
Növbəti gün (25 noyabr) isə MİRAS İctimai Birliyinin sədri Fariz Xəlili tərəfindən hazırlanan “Azərbaycanda arxeoloji sahələrin idarə edilməsi” adlı təqdimata baxış keçirilib. Eyni zamanda, Tarix üzrə fəlsəfə doktoru və Tarix və arxeologiya departametinin müəlimi Bayram Quliyev də “Azərbaycan mədəni irsi: tarixi sərlövhə” mövzusunda çıxış edib.
Təqdimatlardan sonra qonaqlar, Xəzər Universitetinin tələbələri və əməkdaşları ilə “Mədəni İrs” mövzusunda müzakirələr aparılıb.