2022-ci il noyabrın 8-də Qazaxıstanın Almatı şəhərində Zəfər Günü və Azərbaycan Respublikası ilə Qazaxıstan Respublikası arasında diplomatik münasibətlərin qurulmasının 30-cu ildönümü münasibətilə təntənəli tədbir keçirilmişdir.
Tədbirdə Azərbaycanın Qazaxıstandakı səfiri Ağalar Atamoğlanov, Qazaxıstanın xalq yazıçısı, ictimai xadim, hər zaman Azərbaycanı dəstəkləyən Oljas Süleymenov, diplomatik nümayəndəliklərin üzvləri, AR Milli Məclisinin deputatları, ictimai-siyasi xadimlər, Azərbaycan diasporunun nümayəndələri iştirak etmişdir.
Səfir Ağalar Atamoğlanov qonaqları salamlayaraq, Azərbaycan xalqının tarixinin şanlı səhifəsini təşkil edən 8 Noyabr - Zəfər Günü münasibətilə təbrik etmişdir. Ermənistanın 30 ilə yaxın davam edən işğal siyasəti, şanlı qələbəmizə gedən yol, 44 günlük Vətən Müharibəsi və hazırda azad olunmuş ərazilərimizdə aparılan bərpa və yenidənqurma işləri barədə məlumat vermişdir.
Digər rəsmi çıxışlarla tədbirin rəsmi hissəsi bitdikdən sonra Azərbaycanın xalq artistləri, xanəndə Mələkxanım Əyyubova, tarzən Möhlət Müslümov, kamança ifaçısı Fəxrəddin Dadaşov, Azərbaycan Akademik Opera və Balet Teatrının opera müğənnisi, Azərbaycanın əməkdar artisti İlahə Əfəndiyeva, pianoçu, beynəlxalq müsabiqələr laureatı Zülfiyyə Sadıqova (Xəzər Universiteti Musiqi və incəsənət departamentinin müdiri, əməkdar müəllim), həmçinin, Qazaxıstanın “Saltanat” dövlət rəqs ansamblı və “Bahar” ansamblı xüsusi konsert proqramı ilə çıxış etmişlər.