2022-ci il noyabrın 10-da Xəzər Universiteti ilə İsveç Kənd Təsərrüfatı Elmləri Universiteti (SLU) arasında onlayn görüş keçirildi.

Görüşdə Xəzər Universitetinin rektoru dosent İradə Xəlilova, Həyat elmləri departamentinin baytarlıq üzrə koordinatoru b.ü.f.d. Ayaz Məmmədov və departamentin dosenti, b.ü.f.d. Cavid Ocaqi, SLU-dan Molekulyar Elmlər Bölməsinin dosenti Qalia Zamaratskaya və SLU-nun “Aqronomiya – Qida Elmi” sahəsi üzrə tələbəsi Simon Tobias iştirak etdilər.

Qalia Zamaratskaya HanimSpac layihəsinin əsas məqamları baradə qısa təqdimat etdi. Sonra isə İradə Xəlilova Xəzər Universitetinin strukturu, elmi fəaliyyəti, beynəlxalq əməkdaşlıq və s. barədə tədbir iştirakçılarını məlumatlandırdı.

A.Məmmədov isə Xəzər Universitetinin rektorunun rəhbərliyi altında Həyat elmləri departamentinin əməkdaşları tərəfindən Azərbaycanın müxtəlif regionlarında fermer və istehlakçılar arasında heyvan rifahı ilə əlaqədar apardıqları sorğunun nəticələrini iştirakçıların diqqətinə çatdırdı.

Müzakirələrdən sonra Xəzər Universiteti tərəfindən heyvan rifahı ilə bağlı aparılmış sorğunun nəticələri statistik təhlil edilərək, SLU ilə birgə beynəlxalq məqalənin hazırlanması qərara alındı.