Xəzər Universitetinin Tarix və arxeologiya departamenti tərəfindən 2022-ci il noyabrın 4-də 8 Noyabr Zəfər Günü ilə bağlı tədbir keçirildi.  

Tədbirdə II Qarabağ müharibəsinin şəhidi leytenant Murad Nağıyevin anası Xavər Məhəmmədi və ailə üzvləri iştirak etdilər.  

Hümanitar, təhsil və sosial elmlər fakültəsinin dekanı Dos. Elza Səmədli, Tarix və arxeologiya departamentinin müdiri Dr. Telman Nüsrətoğlu, departamentin müəllimləri Rüxsarə Quliyeva və Bayram Quliyevin çıxışlarında Ermənistan-Azərbaycan münaqişəsinin tarixinə nəzər salındı, 44 günlük müharibədə Azərbaycan ordusunun qazandığı böyük zəfərdən və bunun  Azərbaycan xalqı və gənclər üçün daşıdığı dəyərdən bəhs olundu. Bayram Quliyev, həmçinin, Qarabağ bölgəsinə etdiyi səfərlə bağlı təəssüratlarını fotoşəkillərlə hazırlanmış slayt formasında təqdim etdi.  

Tədbirin ən təsirli hissəsi rejisor Kamran Ağabalayevin  iştirakı ilə şəhid Murad Nağıyev haqqında filmin nümayişi oldu. Filmdə şəhidin öz qələmindən çıxan şeirlər də səsləndirildi və iştirakşılar tərəfindən maraqla qarşılandı. Şəhidin anası Xavər Məhəmmədi oğlunun xatirəsinin belə yad edilməsinə görə ailə adından minnətdarlıq bildirdi.