2022-ci ilin oktyabr ayı ərzində Xəzər Universitetinin Humanitar, təhsil və sosial elmlər fakültəsinin Tarix müəllimliyi ixtisası üzrə təhsil alan birinci kurs tələbələri üçün AMEA Arxeologiya, Etnoqrafiya və Antropologiya İnstitutunun Muzey-sərgi zalında “Arxeoloji rəsm” adlı praktik dərslər keçilmişdir. Dərslər institutun əməkdaşı və eyni zamanda, Xəzər Universitetinin Tarix və arxeologiya departamentinin müəllimi Orxan Zamanovun təşkilatçılığı ilə Azərbaycan Rəssamlar İttifaqının üzvləri - Avropa Təbii Elmlər Akademiyasının üzvü İskəndər Məmmədov (qrafika) və Məryəm Məmmədova (bədii keramika) ilə birgə gerçəkləşdirilmişdir.

Tələbələrə gələcək peşə fəaliyyətlərində zəruri ola biləcək bilik və bacarıqlar öyrədilmiş, tarixi keramika ilə bilavasitə tanışlıq və onunla rəftar qaydaları aşılanmışdır. Dərslər, qeyd edildiyi kimi, Muzey-Sərgi zalında AMEA Arxeologiya, Etnoqrafiya və Antropologiya İnstitutunun Elmi fond və Ekspozisiya şöbəsinin müdiri Dr. Fərhad Quliyevin dəstəyi, yekun dərslər isə Xəzər Universitetinin Mərkəz kampusunda həmin kampusun koordinatoru Kəmalə Əsgərovanın dəstəyi ilə həyata keçirilmişdir.

Tələbələrə verilən tapşırıqlar və keçilən dərslərin nəticələri tədrisi aparan rəssamlar tərəfindən müsbət qiymətləndirilmiş və praktik dərs özünü doğrultmuşdur. Həmçinin, belə əyani dərsin Bakının tarixi məkanı olan İçərişəhərdə Muzey-sərgi zalında arxeoloji eksponatlar və artefaktlar arasında keçirilməsi, bilavasitə tarixi maddi-mədəni irslə təmasda olmaq gələcəyin gənc tədqiqatçıları və tarix müəllimləri üçün əhəmiyətli bir təcrübə olmuşdur.