Xəzər Universiteti Neft mühəndisliyi departamentinin müdiri Dr. Elşən Abdullayev Erasmus+ İşçi Heyətinin Mobilliyi (KA107) layihəsi çərçivəsində oktyabrın 17-22-də İtaliyanın Turin Politexnik (Politecnico di Torino) Universitetində səfərdə olub.

Səfərin məqsədi müxtəlif tədqiqat laboratoriyalarında olmaq və tərəfdaş universitet ilə gələcək əməkdaşlıq yönümündə layihələri müzakirə etmək olmuşdur. Proqram çərçivəsində Dr.Elşən Abdullayevin universitetin professorları Alberto Godio və Laura Valentina Socco ilə görüşlərində əməkdaşlıq məsələləri, habelə georesurs və geoenergetika mühəndisliyi ixtisası üzrə tələbə mübadiləsi proqramının həyata keçirilməsi ilə bağlı müzakirələr aparılıb.

Həmçinin, Dr.Elşən Abdullayev universitetin Mineralogiya muzeyində və tədqiqat laboratoriyalarında, Valdiiridə praktiki sahə işində olub.

Dr.Elşən Abdullayevin səfəri professor Fulvia Chiampo tərəfindən təşkil olunub və onlar Erasmus potensialının artırılması layihəsini müzakirə ediblər.

Qeyd edək ki, professor Fulvia Chiampo 2022-ci ilin aprel ayında Erasmus+ Mübadilə proqramı çərçivəsində Xəzər Universitetində olub.