2022-ci il oktyabrın 17-21-də Türkiyənin Ankara şəhərində yerləşən Qazi Universitetinin professoru Onur İnam və Türkiyənin Kütahya şəhərində yerləşən Dumlupinar Universitetinin mühazirəçisi Zeynep Duyar Erasmus+ İşçi Mobilliyi Mübadilə Proqramı çərçivəsində Xəzər Universitetinin Humanitar, təhsil və sosial elmlər fakültəsi, Təbiət elmləri və mühəndislik fakültəsi və Beynəlxalq əlaqələr ofisi tərəfindən qəbul edildi.

Proqramın ilk günü Tədris işləri üzrə prorektor Məhəmməd Nuriyev, Beynəlxalq əlaqələr üzrə prorektor Vlad Vernygora, İctimai əlaqələr və media üzrə direktor Əlövsət Əmirbəyli, Humanitar, təhsil və sosial elmlər fakültəsinin dekanı Elza Səmədova, Təbiət elmləri, sənət və texnologiya yüksək təhsil fakültəsinin dekanı Səidə Şərifova, Təbiət elmləri və mühəndislik fakültəsinin dekanı Fəxrəndə Əlimərdanova, Hüquq departamentinin müdiri Cabir Xəlilov, Fizika və elektronika departamentinin müdiri Fəridə Tatardar, Kimya mühəndisliyi departamentinin koordinatoru Rəsul Muradi və Beynəlxalq əlaqələr ofisinin koordinatoru Fatimə Vəliyevanın iştirakı ilə türkiyəli mütəxəssislərlə tanışlıq görüşü keçirildi.

Görüşdə Vlad Vernygora Xəzər Universiteti, Onur İnam Qazi Universiteti və Zeynep Duyar Dumlupinar Universiteti haqqında təqdimatla çıxış etdilər.

Növbəti olaraq, Fizika və elektronika departamentində Fəridə Tatardar və Kimya mühəndisliyi departamentində Rəsul Muradi ilə görüş keçirilmiş və qonaqlara departament və laboratoriyaların fəaliyyəti haqqında geniş məlumat verilmişdir.

Universitetin Kitabxana İnformasiya Mərkəzinin direktor müavini Aytac Misgərli qonaqları mərkəzin fəaliyyəti ilə tanış etmişdir.

Proqramın digər günlərində Onur İnamın Mexanika mühəndisliyi departamentinin koordinatoru Mehdi Kiyasatfar və Həyat elmləri departamentinin koordinatoru Cavid Ocaqi ilə fərdi görüşləri keçirilmişdir. Görüşlərdə iki universitet arasında departamentlərarası əməkdaşlıq haqqında müzakirələr oldu.

Onur İnam proqram çərçivəsində Təbiət elmləri və mühəndislik fakültəsinin tələbələrinə “Süni İntellekt“ mövzusunda mühazirə söyləmişdir.

Zeynep Duyar Siyasi elmlər və fəlsəsə departamentinin müdiri Fərid Quliyev və departamentin müəllimi Baba Bayramov ilə görüşmüşdür. Həmçinin, Hüquq departamentinin müdiri Cabir Xəlilov və baş müəllim Akif Əlizadə ilə keçirilmiş görüşdə universitetlərin hüquq departamentlərinin iş prinsipi müqayisəli şəkildə müzakirə olunmuşdur.

Nailəxanım Mədəniyyət Mərkəzində qonaqlara Nailəxanım İsayevanın həyat və fəaliyyətini əks etdirən eksponatlar haqqında ətraflı məlumat verilmişdir.

Səfərin son günü isə türkiyəli mütəxəssislər “Atəşgah məbədi” Dövlət Tarix-Memarlıq Qoruğunda olmuş, Təhsil və sosial elmlər fakültəsi və Təbiət elmləri və mühəndislik fakültəsinin dekanları tərəfindən onlara proqramı uğurla başa çatdırdıqlarına görə sertifikat təqdim edilmişdir.