Azərbaycan Diasporuna Dəstək Fondu Koreya Respublikasının Beynəlxalq Dil və Ədəbiyyat Assosiasiyası ilə birgə “Şuşa ili” elan olunması münasibətilə “Azərbaycan ədəbiyyatında Qarabağ” mövzusunda birgə layihə təşkil etmişdir. Layihə çərçivəsində Xəzər Universitetinin Dillər və ədəbiyyatlar Departamentinin müəllimi Aynur Qəzənfərqızının da “Folklorun ədəbiyyatın və fəlsəfi fikrin yaranmasına təsiri - Qarabağdan toplanmış mətnlər əsasında” adlı məqaləsi Cənubi Koreyada nəşr edilən Beynəlxalq Dil və Ədəbiyyat dərgisinin 52-ci buraxılışında dərc olunmuşdur.
Məqalədə Qarabağdan toplanmış folklor mətnlərinin qarabağlı müəlliflərin əsərlərinə təsiri araşdırılır. Qeyd olunur ki, folklor mətnləri ədəbiyyatda həm olduğu kimi, həm də dəyişdirilərək istifadə olunur. Qarabağ folklor mətnləri də ədəbiyyatda hər iki formada işlənmişdir. N.Vəzirov, Ə.Haqverdiyev, Y.V.Çəmənzəminli, Ü.Hacıbəyli kimi yazarlar öz əsərlərində folklor süjetlərindən istifadə etmişlər. Məqalə azərbaycanlı müəlliflərin əsərlərinin və Qarabağ folklor mühitinin koreyalı oxucular tərəfindən tanınması üçün əhəmiyyətlidir.