2022-ci il oktyabrın 1-də Elm və Təhsil Nazirliyinin təşkilati dəstəyi ilə Azərbaycanda təhsil alan əcnəbi tələbələrin Şuşa şəhərinə səfəri baş tutub.
Səfərdə Xəzər Universitetinin əcnəbi tələbələri - İqtisadiyyat və biznes yüksək təhsil fakültəsinin tələbəsi Abdullahi Aduabga Yahaya və Təbiət elmləri, sənət və texnologiya yüksək təhsil fakültəsinin magistr tələbəsi Hanhae Hong iştirak ediblər.
Müvafiq qeyri-hökumət təşkilatının layihəsi çərçivəsində həyata keçirilən səfərə 18 ali təhsil müəssisəsindən 36 ölkəni təmsil edən 44 əcnəbi tələbə cəlb olunub.
Səfər çərçivəsində əcnəbi tələbələrə işğaldan azad olunan ərazilərin zəngin təbiəti, mədəni və tarixi irsi barədə ətraflı məlumat verilib. Onlar Şuşa qalası və Cıdır düzündə olublar. İşğal zamanı Azərbaycanın görkəmli şəxsiyyətləri olan Bülbülün, Xurşidbanu Natəvanın və Üzeyir Hacıbəyovun güllələnmiş heykəlləri tələbələrə nümayiş olunub.
Sonda xatirə şəkli çəkdirilib, əcnəbi tələbələrin təəssüratları dinlənilib.