2022-ci il iyunun 7-9-da Türkiyənin İstanbul şəhərində XXV Avrasiya Zirvə Toplantısı keçirildi. Zirvə toplantısında dünyanın 44 ölkəsindən dövlət rəhbərləri, baş nazirlər, parlament sədrləri, millət vəkilləri, xarici işlər nazirləri, din xadimləri, qeyri-hökümət təşkilatlarının nümayəndələri və digər rəsmi şəxslər iştirak edirdilər. Xəzər Universitetinin İctimai əlaqələr və media üzrə direktoru Əlövsət Əmirbəyli də rəsmi dəvətlə toplantının iştirakçısı. Ə.Əmirbəyli, eyni zamanda, Zirvə toplantısının katibliyinə seçilmişdi.

Türkiyə Böyük Millət Məclisinin deputatı, Parlamentin Türkiyə-Azərbaycan dostluq qrupunun rəhbəri Şamil Ayrım Zirvə toplantısının iştirakçılarına Türkiyə prezidenti Rəcəb Tayyib Ərdoğanın təbrik məktubunu oxudu və sammitin işinə uğurlar arzuladı.

Zirvə toplantısında bir çox ölkələrin prezidentləri və digər rəsmi şəxslər konfransın əhatə etdiyi məsələlərlə bağlı çıxış etdilər.

Zirvə Toplantısının sonuncu günü on ölkənin prezidentləri “COVİD-19 və Ukrayna-Rusiya savaşı sonrası dünya düzəni” mövzusunda təmsil etdikləri ölkələrinin siyasi mövqeyini iştirakçılara çatdırdılar.

Zirvə Toplantısında çıxış edən ukraynalı jurnalist, Krım Tatar türkü Gülsüm Xalilova və Polşanın sabiq müdafiə naziri Adam Boqdan Klich Ukraynada gedən savaş, Buça, İrpen, Qostamel, Mariopol və digər şəhərlərdə Rusiya tərəfindən həyata keçirilən soyqırımdan danışdılar. Dünya dövlətlərini və bütün bəşəriyyəri Ukraynaya dəstək verməyə çağırdılar.

Zirvə Toplantısının sonunda iştirakçıların şərəfinə İstanbul Böyük Şəhər Bələdiyyəsi Xalq musiqisi qrupunun iştirakı ilə böyük ziyafət verildi.