2021-ci il dekabrın 16-da Xəzər Universitetinin Fikrət Əmirov Konfrans-Konsert Mərkəzində Əməkdar incəsənət xadimi, bəstəkar, professor Elnarə Dadaşovanın yaradıcılıq gecəsi keçirildi.

Tədbirdə Xəzər Universitetinin rəhbərliyi və əməkdaşları, tələbələr, musiqi ictimaiyyətinin nümayəndələri iştirak edirdilər.

Tədbir bəstəkar haqqında qısametrajlı filmin nümayişi ilə başlandı. Sonra sənətşünaslıq üzrə fəlsəfə doktoru, Azərbaycan Milli Konservatoriyasının dosenti Jalə Qulamova yaradıcılığının kamillik dövrünü yaşayan Elnarə Dadaşovanın zəngin və çoxşaxəli fəaliyyətindən geniş məlumat verdi.

Konsertdə Xəzər Universiteti Musiqi və incəsənət departamentinin müdiri, əməkdar müəllim, pianoçu Zülfiyyə Sadıqovanın bədii rəhbərliyi ilə universitetin Kamera orkestri, Xəzər Universitetinin müəllimi, beynəlxalq müsabiqələr laureatı Məhsəti Cabbarovanın rəhbərliyi ilə universitetin tələbələrdən ibarət xor kollektivi iştirak edirdi.

Solistlər - beynəlxalq müsabiqələr laureatı Fəxri Kazım-Nicat, Məhsəti Cabbarova, Georgiy Şaroyev adına 11 illik musiqi məktəbinin şagirdi Mehriban Əliyeva, Xəzər Universitetinin tələbəsi Ramil Sayidov, kamança ifaçısı, Xəzər Universitetinin müəllimi, əməkdar artist Rauf İslamov idi.

Konsertdə bəstəkarın "Ana", "Anam məni istəyir" (sözləri Sayalı Tağıyevanın), "Böyüklərim yada düşdü" (sözləri Hamlet İsaxanlının), "Bahar şərqisi" (sözləri Səməd Vurğunun), "Lay-lay" (sözləri Əhməd Cəmilin), "Vüqarlı dağların sevirəm, Vətən" (sözləri Hüseyn Sözlünün), "Döyüş cəngisi" (sözləri Bəşir Quliyevin), "Prelüd", "Sarı gəlin" xalq mahnısının kamera orkestri üçün işlənmiş variantı, "Sənə düşüb meylim" (sözləri Əhməd Cavadın), "Adajio" və "Alqış qeyrətinizə" (sözləri Şahinin) əsərləri səsləndi. Hamlet İsaxanlının sözlərinə yazılmış mahnı oxunarkən videoçarxda onun dünyasını dəyişmiş qohumlarının və özünün fotoşəkilləri nümayiş olundu.

Tədbirdə Xalq artisti, Üzeyir Hacıbəylinin ev muzeyinin direktoru bəstəkar Sərdar Fərəcov çıxış edərək, Elnarə xanım Dadaşovanın yaradıcılığından söz açdı, konsert və iştirakçıları haqqında xoş təəssüratını bildirdi.

Xəzər Universitetinin təsisçisi, Direktorlar və Qəyyumlar Şurasının sədri, professor, akademik Hamlet İsaxanlı çıxışında Elnarə xanım Dadaşovanın yaradıcılığının səciyyəvi cəhətlərini nəzərə çatdırdı, universitetin musiqi kollektivlərinin fəaliyyətini yüksək qiymətləndirdi.

Bütün konsert müddətində həm royal arxasında ifaçı, həm də dirijor kimi rəhbərlik edən Elnarə Dadaşova tədbirin sonunda tamaşaçılara, Xəzər Universitetinin Kamera orkestrinə və xor kollektivinə, xüsusilə gecənin keçirilməsində ona dəstək olan Hamlet İsaxanlıya çox dərin təşəkkürünü bildirdi. Səhnəni gül-çiçəklərə qərq edən tamaşaçılar sonda bəstəkarla xatirə şəkli çəkdirdilər. Konsert çox uğurlu, yaddaqalan keçdi və dinləyicilərə müsbət aura, xoş təəssürat bağışladı.