2021-ci il dekabrın 1-də Bakı Olimpiya Stadionunda Azərbaycan Respublikası Təhsil Nazirliyinin dəstəyi ilə keçirilən EdTech Startup müsabiqəsinin finala vəsiqə qazanan komandaları ilə görüş keçirilib.
Müsabiqədə Azərbaycanın müxtəlif universitetlərini təmsil edən 244 komandadan yalnız 10 komanda finala vəsiqə qazanıb. Finala vəsiqə qazanan 10 komandadan biri də məhz Xəzər Universitetini təmsil edən ‘Piramida’ komandasıdır. Komanda iştirakçıları universitetin 3-cü kurs tələbəsi Müşviq Nağızadə (Biznesin təşkili ixtisası) və 1-ci kurs tələbəsi İlkin Səfərovdur (Mühasibat ixtisası). Startup müsabiqəsinin Xəzər Universiteti üzrə koordinatorluğunu isə Təhsil Departamentinin koordinatoru Cavid Cəfərov həyata keçirir.
Müsabiqənin final mərhələsi dekabrın 10-da JW Mariott Absheron otelində baş tutacaq. İlk 3 yeri qazanan komandalar startup ideyalarını həyata keçirmək üçün pul mükafatı qazanacaqlar.
Azərbaycan Respublikası Təhsil Nazirliyinin dəstəyi ilə keçirilən EdTech Startup müsabiqəsi ali təhsil müəssisələrində oxuyan tələbələr arasında keçirilən bir yarışmadır. Yarışmanın əsas məqsədi tələbələr arasında hazırda ölkəmizdə təhsil sahəsində olan boşluq və problemlərin müəyyənləşdirilməsi, onları aradan qaldırmaq üçün texnoloji həllərin təqdim olunmasıdır.