2021-ci il noyabrın 1-dən 14-dək "İqtisadiyyat və Biznes Yüksək Təhsil" fakültəsinin Mediasiya ixtisası üzrə MBA tələbələri “Mediasiyanın əsasları” fənninin müəllimi Nilufər Əlizadənin rəhbərliyi ilə Xəzər Universitetinin tərəfdaş kimi iştirak etdiyi Avropa Komissiyasının “Erasmus+” proqramının “MEDIATS” layihəsi çərçivəsində Niderland Kırallığının Dordrecht şəhərində Niderland Biznes Akademiyasının təşkil etdiyi mediasiya üzrə iki həftəlik intensiv təcrübə-təlim proqramında iştirak ediblər. “MEDIATS” layihəsinin əsas məqsədi universitetləri mediasiya sahəsində aparıcı qüvvələrə çevirməklə Azərbaycan, Gürcüstan və Ukraynada Avropa təcrübəsindən faydalanaraq, münaqişələrin məhkəməyə qədər obyektiv həllini yaxşılaşdırmaqdan ibarətdir.
Təlimdə tələbələr Mehriban Yusifova, Nəzrin Bağırlı, Qasım Şalıyev, Zaur Məmmədli və Orxan Məmmədli iştirak ediblər. Ümumi 250 saatlıq (9 AKTS) tədris yükü ilə mediasiya kursunu uğurla başa vuran tələbələr Beynəlxalq Magistr Mediasiya Federasiyası və Hollandiya Biznes Akademiyası tərəfindən mediasiya üzrə diplomlara layiq görülüblər. Eyni zamanda, müəllim Nilufər Əlizadə həmqiymətləndirici kimi fəaliyyətinə görə xüsusi fərqlənmə sertifikatı ilə təltif edilmişdir.
Tələbələrimizi bu böyük nailiyyət münasibətilə təbrik edir, onlara akademik və peşəkar karyeralarında yeni-yeni uğurlar arzulayırıq.