2021-ci il noyabrın 10-da Bakı Ali Neft Məktəbində Erasmus+ ECAR layihəsi çərçivəsində Azərbaycandakı ali təhsil müəssisələrində  ünsiyyət, əməkdaşlıq və şəbəkələşmə ilə bağlı keçirilən tədqiqatların nəticələrinə həsr olunmuş görüş keçirilmişdir. Xəzər Universitetinin tərəfdaşı və Bakı Biznes Universitetinin koordinatoru olduğu bu layihənin görüşündə Azərbaycandan olan layihə tərəfdaşları və Avropa universitetlərindən olan tərəfdaşlar daxil olmaqla rektor və prorektorlar iştirak edirdilər.

Tədbir Təhsil Nazirliyinin elm, ali və orta ixtisas təhsili şöbəsinin müdiri Nicat Məmmədlinin giriş sözü ilə başladı. Milli Erasmus+ Ofisinin rəhbəri Pərviz Bağırov layihə haqqında qısa məlumat verdi.

Görüş Litvanın Mykolas Romeris Universitetinin əməkdaşı Dr. Inga Juknytė-Petreikienė`nin sorğunun nəticələrinə əsasən Azərbaycandakı ali təhsil müəssisələrinin ehtiyacları haqqında təqdimatı ilə davam etdi. Həmin universitetin elmi işlər üzrə prorektoru professor Regina Valutyte Azərbaycan Rektorlar Konfransının yaradılması üçün qanunvericilik bazasına aid izahat verdi.

Tədbirin növbəti hissəsində professor Regina Valutyte və Bakı Biznes Universitetinin əməkdaşı Gülşən Bayramova araşdırma nəticələrinə əsasən  Azərbaycan Rektorlarının Konfransı üçün ən uyğun idarəetmə modelini təqdim etdilər. layihənin Avropa İttifaqı (Aİ) tərəfdaşları tədqiqatın nəticələrinə dair öz fikirlərini bölüşdülər.

Tədbir Azərbaycan universitetlərindən olan rektorların müzakirəsi ilə yekunlaşdı.

Görüşdə Xəzər Universitetini universitetin rektoru İradə Xəlilova, Beynəlxalq əlaqələr üzrə prorektoru Vlad Vernygora və İnkişaf departamentinin rəhbəri Raziyə İsayeva təmsil edirdilər.