44 günlük Vətən müharibəsi ərzində Azərbaycan 30 ilə yaxın işğal altında olan ərazilərini, torpaqlarını düşmən tapdağından azad edərək, Zəfər Gününü təsis etdi. Bu zəfər ölkəmizdə xüsusi təntənə ilə qeyd olunduğu kimi, “Dünya” məktəbində də geniş şəkildə təşkil olundu.

Tədbir iştirakçıları tərəfindən torpaqlarımızı düşmən tapdağından azad edərkən şəhid olmuş əsgər və zabitlərimizin xatirəsi yad edildi.

Şəhidlərin adı verilmiş sinif otaqlarından çəkilmiş, eyni zamanda, şəhid analarının, qazilərin, müharibə iştirakçılarının müsahibələrindən hazırlanmış videolar nümayiş etdirildi.

Tədbir iştirakçıları məktəbin müəllim və şagirdlərinin ifasında ev-eşiklərindən, yaşadıqları torpaqlardan didərgin düşmüş, 30 il qaçqın həyatı sürən insanların həyatına həsr edilmiş tamaşanı seyr etdilər. Tamaşanın ümumi ideyası Birinci Qarabağ müharibəsində atasını itirən, anası və qardaşı ilə başsız qalan ailədə uşaqlığının ən gözəl dövrləri qaçqın həyatında puç olan gənc bir qızın acı xatirələrinin, İkinci Qarabağ müharibəsində qəhrəmancasına şəhid olmuş qardaşının taleyi timsalında münaqişə və müharibə qurbanlarının həyatlarının reallığını ifadə etməkdən ibarət idi.

Tamaşadan sonra məktəbin şagird və müəllimləri şəhid uşaqların xatirəsinə həsr edilən sürrealist üslubda hazırlanmış müasir xoreoqrafik səhnə nümayiş etdirdilər.

Zəfər bayramı münasibətilə təşkil olunan tədbirdə Bakı “Dünya” məktəbi ilə bərabər Sumqayıt “Dünya” məktəbinin də şagirdləri çıxış etdilər. Hər iki məktəbin şagirdləri zəfər təntənəsi ilə bağlı mətnlər və şeirlər səsləndirdilər, qəhrəmanlıq nəğmələri və rəqsləri ifa etdilər.

Tədbirdə müharibə iştirakçıları, Xəzər Universitetinin şəhid tələbələrinin valideynləri, “Dünya” məktəbinin müharibədə iştirak edən əməkdaşları, oğulları müharibədə olan müəllimlər, Vətən Müharibəsi Qəhrəmanlari - əsgərlər, qazilər, şəhid anaları və ailələri, o cümlədən, Azərbaycanın bölgələrindən dəvət olunan şəhid ailələri, Xəzər Universitetinin rəhbərliyi, əməkdaşları, "Dünya" Təhsil Kompleksinin əməkdaşları, Binəqədi Rayon İcra Hakimiyyətinin və Binəqədi Rayon Ağsaqqallar Şurasının nümayəndələri iştirak edirdilər.