2021-ci il oktyabrın 28-də Xəzər Universitetinin Dillər və ədəbiyyatlar departamentinin təşkilatçılığı ilə “Ünsiyyətin təkamülü: Mağara rəsmlərindən rəqəmsal görüntülərə” mövzusunda konfrans keçirildi.
Konfransda Dokuz Eylül Universiteti Ədəbiyyat fakültəsi dilçilik bölümündən Prof. Dr. V.Doğan Günay, Giresun Universiteti Sosial Elmlər İnstitutu Avrasiya araşdırmaları bölümü tədqiqatçısı Betül Çanakpınar və Ardahan Universiteti Humanitar Elmlər və Ədəbiyyat Fakültəsi Türk dili və ədəbiyyatı bölümünün elmi işçisi Z.Hande Akata çıxış etdilər.
“Ünsiyyət nədir?”, “Yazının yaranma tarixi”, “Bu günün kommunikasiya texnologiyaları”, “Süni intellekt”, “Gələcəyin insanı azaddırmı?”, “Yeni elm yaranır!”, "Sabahın ünsiyyət vasitələri nə dərəcədə təhlükəsizdir?" mövzuları ətraflı izah edilməklə big data və texno-millətçilik haqqında məlumatlar təqdim olundu və insanın əsas ehtiyaclarından biri olan ünsiyyətin dəyişməsi, inkişafı məsələlərinə münasibət bildirildi.
Konfransın sonunda tələbələrin sualları cavablandırıldı.