2021-ci il oktyabrın 8-də Xəzər Universiteti Elmi şurasının növbəti iclası keçirildi.
İclası universitetin rektoru dosent İradə Xəlilova açaraq, əvvəlcə yeni tədris ili münasibətilə universitet əməkdaşlarını təbrik etdi və tədris fəaliyyətində müvaffəqiyyətlər arzuladı.
Şuranın sədri daha sonra gündəlikdəki məsələləri elmi şura üzvlərinin nəzərinə çatdırdı. Gündəlikdəki birinci məsələ ilə bağlı Təbiət elmləri və mühəndislik fakültəsinin dekanı Fəxrəndə Əlimərdanova, İqtisadiyyat və menecment fakültəsinin dekanı Ceyhun Məmmədov, Humanitar, təhsil və sosial elmlər fakültəsin dekanı Elza Səmədova və Təbiət elmləri, sənət və texnologiya yüksək təhsil fakültəsinin dekanı Səidə Şərifovanın təqdimatı əsasında universitetin bakalavr və magistratura tədris pilləsini bitirən məzunlar haqqında məlumatlar şura üzvlərinə təqdim edildi.
Magistratura tələbələri və doktorantların dissertasiya mövzuları və elmi rəhbərlərinin təsdiqi ilə bağlı ikinci məsələ haqqında ətraflı məlumat şura üzvlərinin nəzərinə yüksək təhsil fakültələrinin dekanları tərəfindən çatdırıldı. Mövzular haqqında qısa məlumat verildi və müzakirələr aparıldı.
Daha sonra Azərbaycan ədəbiyyatı ixtisası üzrə fəlsəfə doktoru imtahanlarının keçirilməsi üçün proqramın hazırlandığı və təsdiq olunması üçün Ali Attestasiya Komissiyasına göndərilməsi məsələsi müzakirə edildi.
Cari məsələlərdə departamentlərin fəaliyyət planında nəzərdə tutulmalı məsələlər, seminarlar və konfransların keçirilməsi müzakirə olundu və departamentlərə müvafiq tapşırıqlar verildi. Bundan əlavə, universitetin elmi fəaliyyəti haqqında hesabatın hazırlanmasının vacibliyi haqqında danışıldı və hesabatda tələb olunan məlumatlar, onların tərtibi qaydası və s. haqqında şura üzvlərinə məlumat verildi, məsələ ilə bağlı departamentlərin vəzifələri bir daha xatırladıldı.
Sonda ilin sonunda doktorantların illik attestasiyasının keçirilməsi və bununla bağlı departamentlər və yüksək təhsil fakültələrinin öhdəsinə düşən vəzifələr müzakirə olunaraq, müvafiq qərarlar qəbul edildi.